Норуодунай учуутал Михаил Алексеев төрөөбүтэ 100 сылын Үөһээ Бүлүүтээҕи лицей үөрэнээччилэрэ бэлиэтээтилэр
Бүгүн ССРС норуодунай учуутала Михаил Алексеев төрөөбүтэ 100 сылын Үөһээ Бүлүүтээҕи интэринээт-лицей үөрэнээччилэрэ, учууталлара бэлиэтээтилэр. Бу кыһа Михаил Алексеев аатын сүгэр.
Александр ТАРАСОВ, «Саха сирэ» хаһыат, https://edersaas.ru
Аналлаах тэрээһиҥҥэ сарсыардаттан аһаҕас уруоктар, ыҥырыылаах ыалдьыттары кытта көрсүһүү буолла. Үөрүүлээх тэрээһиҥҥэ 9 “б” кылаас үөрэнээччилэрэ Михаил Андреевич ыарахан, уустук олоҕун уонна кини саха норуотун туһугар элбэҕи оҥорбутун хоһоонунан композицияны көрдөрөн, мустубут дьону уйадыттылар. Итини тэҥэ, лицей бэһис кылааһыгар Михаил Алексеев аатын иҥэриини мустубут дьон ытыс тыаһынан уруйдаатылар. Выпусниктар бэһис кылаас үөрэнээччилэригэр значоктары бэлэхтээтилэр.
Елена Прокопьева, лицей дириэктэрин солбуйааччы:
—Михаил Алексеев төрөөбүтэ 100 сылын бэлиэтиир тэрээһин олус истиҥник ааста. Сарсыардаттан киэһээҥи диэри араас тэрээһиннэр үрдүк таһымнаахтык ыытылыннылар. Үөрэнээччилэр, төрөппүттэр дуоһуйан, астынан бардылар.
Итини тэҥэ, бүгүн өрөспүүбүлүкэтээҕи физикаҕа уонна математикаҕа кэтэхтэн интернет-олимпиадатын тэрийэн ыыттыбыт. Саха сирин үрдүнэн 234 оскуола үөрэнээччитэ кытыннылар. Былырыын олимпиадаҕа 1480 оҕо кыттыбыт эбит буоллаҕына, быйыл Михаил Алексеев төрөөбүтэ 100 сылын бэлиэтиир үөрүүлээх күнүгэр 3000-тахса оҕо кытынна.
Настя Попова, лицей 11-с кылааһын үөрэнээччитэ:
— Ленскэй улууһуттан кэлэн үөрэнэ сылдьабын. Бүгүн Михаил Алексеев төрөөбүтэ 100 сылыгар аналлаах быраһынньыктааҕы туорду быһар чиэскэ тигистим. Үс кылаастан быйыл лицейи кыһыл көмүс мэтээлинэн бүтэриэхтээх уонна лицейгэ оҕо сүбэтин чилиэннэрэ буолан, 100 диэн сыыппаралаах кыраһыабай туорду быһан, оҕолору, ыалдьыттары күндүлээтибит. Улуу учуутал аатын сүгэр лицейи ситиһиилээхтик үөрэнэн түмүктээн эрэрбинэн киэн туттабын. Салгыы үрдүк үөрэххэ өссө үчүгэйдик ылсан үөрэниэм.