Соторутааҕыта Өксөкүлээх Өлөксөй аатынан Норуоттар доҕордоһууларын дьиэтигэр Арассыыйа үтүөлээх, саха норуодунай артыыһа Дмитрий Артемьев 55 сааһын туолуутугар анаан, С.А.Зверев-Кыыл Уола аатынан Үҥкүү тыйаатырын «Бохсуруйуу» этнобалета көһүннэ. Бу балекка сүрүн партияны хайыы үйэҕэ 20-тэн тахса сыл устата Дмитрий Артемьев ситиһиилээхтик толорор.
Бу испэктээк Тыйаатыр сылыгар, аны саас ыам ыйын 12 күнүгэр Москваҕа, Арассыыйа аармыйатын тыйаатырын сценатыгар оонньонуоҕа. Айымньыга, Дьылҕа Хаан ыйааҕынан ойуун буолар аналламмыт тыа уолун устуоруйата кэпсэнэр. Махталлаах көрөөччүлэр, Дмитрий Артемьев бу оруолун олус итэҕэтиилээхтик толорорун бэлиэтииллэр.
Талааннаах артыыһы үбүлүөйүнэн уонна Саха Өрөспүүбүлүкэтин норуодунай артыыһа үрдүк аат иҥэриллибитинэн, Ил Түмэн спикерэ Петр Гоголев уонна дьокутааттар ааттарыттан итиэннэ тус бэйэтин аатыттан Ил Түмэн Ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев эҕэрдэлээтэ.
“Култуураны, үгэстэри, биһиги төрөөбүт өрөспүүбүлүкэбит уонна аан дойду норуоттарын духуобунастарын киэҥник пропагандалааһыҥҥа, тарҕатыыга сүҥкэн кылааккын киллэрэргинэн, бу үрдүк аакка Эн чахчы дьоһуннааххын”, — диэн бэлиэтээтэ Михаил Дмитриевич. Кини, оччолорго үөрэҕин саҥа бүтэрэн дойдутугар үлэлии кэлбит физкултуура учуутала, аатырбыт Гаврил Скрябин салайар “Ньургуhуннар” үҥкүү ансаамбылыгар 9-с кылаас үөрэнээччитин Дима Артемьевы тута бэлиэтии көрөн, чэпчэки атлетиканан дьарыктанарга ыҥырбытын санаан ылла. Сыыспатах эбит этэ — эһиилигэр Дима сүүрүүгэ Чурапчы улууһун чөмпүйүөнэ буолбут. Ол эрээри Дмитрий Артемьев үҥкүүтүттэн харыс да тэйбэккэ, үрдүк ускуустубаҕа бэриниилээҕин чахчы да итэҕэттэҕэ.
“Дмитрий Егорович Артемьев дьиҥнээх норуот артыыһа буолар анала таайдаҕа, талаана арылыннаҕа, диэн бүгүн бу сценаҕа туран астына бэлиэтиибин”, — диэтэ дьокутаат Михаил Гуляев.
Бу дьоро киэһэҕэ үбүлүөйдээх артыыһы эҕэрдэлии кэлбит СӨ култууратын миниистирин солбуйааччы Владислав Левочкин өрөспүүбүлүкэ Ил Дархана Айсен Николаев истиҥ тыллардаах Эҕэрдэ суругун ааҕан туттарда.
Мугудай нэһилиэгин Ытык киһитигэр, киэн туттар талааннаах артыыстарыгар Дмитрий Артемьевка Дьокуускай куорат Култуураҕа уонна духуобунай сайдыыга управлениетын начаалынньыгын солбуйааччы Лариса Андреева, биир дойдулаахтара, Чурапчы улууһун баһылыгын социальнай боппуруостарга солбуйааччы Николай Аммосов, Мугудай нэһилиэгин баһылыгын солбуйааччы Наталья Попова, аймахтара, биир идэлээхтэрэ, үгүс ахсааннаах доҕотторо, талааныгар сүгүрүйээччилэрэ иһирэх эҕэрдэлэрин тиэртилэр.
Татьяна Маркова, «Саха сирэ», edersaas.ru