Үүнэр көлүөнэ тыйаатырын уус-уран салайааччыта, РФ култууратын үтүөлээх үлэһитэ, СӨ норуодунай артыыһа Алексей Павлов бу күннэргэ 60 сааһыгар уонна айар үлэтин 40 сылыгар анаан алтынньы 10-14 күннэригэр кини талааныгар сүгүрүйээччилэргэ айар дьоро киэһэлэри бэлэхтээтэ.
edersaas.ru
Бэйэтин үбүлүөйүн үгүс киһи интэриэһинэй гына тэрийэ сатыыр. Хомойуох иһин, эрэстэрээҥҥэ ыытар тамадалар үбүлүөйдээччи олоҕун ис хоһоонугар болҕомтону улаханнык уурбаттар. Бэркэ гыннар, бирииһинэн «манчыыктаан» олоҕун кэрчиктэриттэн таабырын таайтарыахтара, викторина ыытыахтара. Оттон олоҕун бэлиэ дааталарынан тапталлаах артыыспыт хас да хонугу быһа бэлиэтээбит үбүлүөйүгэр олус интэриэһинэй быыстапка оҥордо. Тыйаатырга киирээккин кытта үбүлүөйдээх киһи салгыныгар оҕустаран, кини тус олоҕун эйгэтигэр киирэҕин. Хайдах? Дьэ, онон үбүлүөйдүүр дьоҥҥо сүбэ быһыытынан норуот артыыһа Алексей Павловтан — маастар-кылаас. Ол ону хаартысканан сырдатыым.
- Киһи олоҕо оскуолатааҕы сылларыттан саҕаланар. Алексей Павлов дьиэтин ыскааба, оскуолаҕа олорбут паартата, тэтэрээттэрэ уонна оҕо сааһын өйдөбүлэ — оскуола кэминээҕи хаартыскалара.
- Эр киһи оскуолата — аармыйа. Алексей бу кэминээҕи олоҕун кэрчигэ, дембелин пуормата, саллааттаабыт кэмин хаартыскалара уонна ол саҕанааҕы армейскай ороно.
- Уол устудьуоннаабыт сыллара. Эдэр саас саамай күндү өйдөбүлэ, олоҕун аналын булар кэмэ.
- «Култуура үлэтэ түбүктээх, ол иһин үлэтэ түмүктээх» — айар куттаах киһи толкуйа, санаата, былаана түмүллэр остуола, лаампата, сиэркилэтэ. Бу тэриллэр эмиэ артыыс олоҕун суолдьуттара буоллаҕа.
- Оруоллара — килиэбэ, сулустаах чааһа, олоҕун анал
- Норуот таптыыр артыыһа. Киэн туттуута. Бу — Алексей Павлов!
Дьэ, ити курдук, олоҕун хас биирдии кэрчигин артыыс Алексей Павлов олус да бэркэ тыйаатыр реквизиттэрин туттан көрдөрбүт. Онон үбүлүөйдүүр дьон маннык олохторун суолдьуттарын — өйдөбүнньүк бэлиэ малларын хайдах баҕарар туһаныахтарын сөп эбит. Хал буолбут таабырыннаах викторинаттан тэйэ түһэн. Дьону соһутан.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.