“Норуот бүддьүөтэ – 2018” бырайыакка сайаапка хомуйуллар

Ааптар: 
Бөлөххө киир:

Айсен Николаев өйөбүлүнэн 2014 сылтан үлэлиир «Норуот бүддьүөтэ» бырайыак чэрчитинэн муниципальнай бүддьүөттэн үбүлэниигэ социальнай хайысхалаах уонна уопсастыбаннай көҕүлээһин бырайыактара күрэхтэһэллэр.

edersaas.ru.

Бу бырайыакка кыттарга сайаапка биирдиилээн дьонтон, тэрилтэлэртэн уонна уопсастыбаннай түмсүүлэртэн хомуйуллар. Сыл ахсын куоракка уопсастыбаннай эбийиэктэри тутууга, өрөмүөннээһиҥҥэ, тупсаран оҥорууга, көҕөрдүүгэ, аһымал аахсыйаларын, волонтердар үлэлэрин тэрийиигэ, үөрэтэр, култуурунай-спортивнай дьаһаллары ыытыыга элбэх бырайыак хамыыһыйаҕа киирэриттэн бастыҥнар талыллан үбүлэнэллэр. Ол түмүгэр, 2014 с. — 47, 2015 с. — 45, 2016 с. — 43 уопсастыбаннай бырайыак олоххо киллэриллибиттэрэ. Быйыл 42 бырайыагынан 30 мөл. солк. суумалаах үлэ оҥоһулунна. Кэлэр сыллаах үлэҕэ сайаапка билигин, One click Yakutsk. портал нөҥүө сэтинньи 1 күнүгэр диэри хомуйуллар.

Виктор Пермяков, «Стрелка-1» саад-оҕуруот табаарыстыбатын бэрэссэдээтэлэ:

Биһиги «Норуот бүддьүөтэ» бырайыагынан оҕо оонньуур былаһааккатын туттубут. Куорат дьаһалтата 500 тыһ. солк. көрбүтүгэр харчы хомуйан эппиппит, оонньуур комплексы Москваттан аҕалтарбыппыт, атынын барытын бэйэбит оҥордубут.

Лидия Шарапова, 19 №-дээх оскуола дириэктэрэ, «Көтөр фабриката» микро-оройуон:

Бэйэбит бырайыакпытынан “Норуот бүддьүөтүгэр” икки төгүл кыттан, үбүлэннибит. Былырыын оскуолабыт тиэргэнин тупсарбыппыт, быйыл автодром оҥордубут. Бу бэртээхэй бырайыакка тирэҕирэн, куораппытын чэчирии сайыннарыаҕыҥ диэммин куорат олохтоохторун ыҥырабын !

Михаил Софронеев, «Белоснежка» уһуйаан салайааччыта:

Биһиги оҕо оонньуур былаһааккатын туттубут. Дьон үтүө санаатын, көҕүлээһинин өйүүр маннык бырайыак баара олус көмөлөөх.

Раиса Сибирякова, “Саха сирэ” хаһыат, edersaas.ru.

+1
0
+1
0
+1
0
+1
0
+1
0
+1
0
+1
0