Норуот бириэмийэтигэр отуттан тахса киһи сайаапка биэрдэ

Ааптар: 
Бөлөххө киир:

Бэҕэһээ, алтынньы 26 күнүгэр, «Саха сирин киэн туттуута» норуот бириэмийэтин «Баҕа өттүнэн көмөлөһөөччү» номинациятыгар сайаапкалары хомуйуу түмүктэннэ.

edersaas.ru


«Баҕа өттүнэн көмөлөһөөччү» («Доброволец») номинацияҕа сайаапкалары хомуйуу алтынньы 18 күнүттэн саҕаламмыта. Куонкуруска кыттарга сайаапканы өрөспүүбүлүкэ араас улуустарыттан 30-тан тахса киһи биэрдэ. Алтынньы 29 күнүттэн бу дьонтон биэс финалиһы талыы ыытыллыаҕа.

Кэрэхсэбиллээҕэ, кыаммат дьоҥҥо, кырдьаҕастарга, оҕолорго, кырдьаҕас дьоҥҥо социальнай хайысхалаах үлэни баҕа өттүнэн ыытар киһи үгүс. Ол курдук, куонкуруска кыттарга оскуола оҕотуттан саҕалаан, 65 сааһыгар тиийэ дьон сайаапка биэрдилэр. Кинилэртэн аҕыйах киһини холобурдуох.

 Афанасий АЛЕКСЕЕВ, 48 саастаах, Сунтаар улууһа:

Киһиэхэ барытыгар буолбатар да, хас биирдиибит кимиэхэ эрэ көмөлөһүөн сөп. Мин кыһалҕалаах дьонтон хаһан да туора хаампаппын. Уустук балаһыанньаҕа түбэспит дьоҥҥо, элбэх оҕолоох кыаммат ыалларга, кырдьаҕастарга өрүү көмөлөһөбүн. Былырыын сыл бүтүүтүгэр төрөөбүт дойдубар, Амма улууһун Өнньүөс нэһилиэгин бары олохтоохторун бэйэм үппүнэн  баһаарынай сигнализациянан хааччыйбытым.

Степан ЗАХАРОВ, 31 саастаах, учууталлар баҕа санаа өттүнэн көмөлөһөр «Түмэн» түмсүүлэрин салайааччыта, Кэбээйи улууһа:

—  «Түмэн» түмсүү чилиэннэрэ аһымал аахсыйалары ыытары күннээҕи үлэбит курдук ылынабыт. 2015 с. бу түмсүүнү тэриниэхпититтэн ыла соҕотох олорор дьоҥҥо, көмөҕө уонна өйөбүлгэ наадыйар дьону анаан көрдөөн булан көмөлөһөбүт. Биһиги көмөбүт бу дьоҥҥо олус наадатын бигэтик өйдүүбүт.

 Николай НИКОЛАЕВ, 15  саастаах, «Факел» волонтердар хамсааһыннарын актыбыыһа, Хаҥалас улууһа: 

Өктөмнөөҕү Научнай-үөрэтэр киин 9«б» кылааһыгар үөрэнэбин. Иллэҥ кэммэр волейболунан уонна мас тардыһыытынан дьарыктанабын. Табаарыстарбын кытта кырдьаҕас дьоҥҥо, «Мичээр» оҕо саадыгар, Аччыгый наука академиятыгар көмөлөһөбүт. 

Бу курдук, баҕа өттүнэн үтүө дьыаланы оҥорор отуттан тахса киһи туһунан кэпсии туруохха сөп. Сэтинньи 5  күнүттэн 9 күнүгэр диэри КЫАЙЫЫЛААҔЫ биэс финалистан  куоластааһын быһаарыахтаах.

«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр, интэриэстэригэр таба тайаммыт, үлэттэн, таптыыр дьарыктарыттан дьоллонор дьону кэмигэр бэлиэтээн көрүү буолар. Кинилэргэ махтал тылларын саамай үлэлэрин, айар-тутар кэмнэрин үөһүгэр сырыттахтарына этэн үөрдүү.

«Саха сирин киэн туттуута» норуот бириэмийэтин «Баҕа өттүнэн көмөлөһөөччү» («Доброволец») номинациятыгар кыттар дьоҥҥутун өйөөҥ. Үтүө Дьулуур сылыгар биллэриллибит «Саха сирин киэн туттуута» норуот бириэмийэтин уочараттаах «Баҕа өттүнэн көмөлөһөөччү» («Доброволец») номинациятыгар  ким кыайыылаах тахсара эһигиттэн тутулуктааҕын умнумаҥ.

«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор уонна «Киэргэ» ювелирнай фирмалар.

Елена ПОТОЦКАЯ, «Саха сирэ» хаһыат, edersaas.ru

Хаартыскалар: СИА саайтыттан.

+1
0
+1
0
+1
0
+1
0
+1
0
+1
0
+1
0