Быйыл өрөспүүбүлүкэҕэ, Ил Түмэн Бэрэстэбиитэллэрин палататын бастакы Бэрэссэдээтэлэ Афанасий Петрович Илларионов төрөөбүтэ 75 сылын дойдутугар Чурапчыга, өр сыл үлэлээбит оройуонугар Нерюнгригэ, сэрии сылларыгар көһөрүллүүгэ тиийэн биһигин ыйаабыт сиригэр Эдьигээҥҥэ уонна Дьокуускайга киэҥник бэлиэтэннэ. Оттон бу күннэргэ киин куоракка түмүктүүр тэрээһиннэр ыытылыннылар.
edersaas.ru
Ол курдук, сэтинньи 28 күнүгэр сарсыарда Ил Түмэҥҥэ Чурапчы улууһун дэлэгээссийэтэ норуот дьокутааттарын, Афанасий Петрович бииргэ үлэлээбит доҕотторун кытта көрүстэ.
Ил Түмэн Бэрэссэдээтэлин бастакы солбуйааччы Анатолий Добрянцев кэпсэтиини саҕалыырыгар, Афанасий Илларионов айымньылаах үлэтин, кини аатын үйэтитиигэ туох оҥоһуллубутун сиһилии сырдатта.
Афанасий Петрович Илларионов төрөөбүтэ 75 сылын бэлиэтииргэ Ил Түмэн Бэрэссэдээтэлэ Александр Жирков салайааччылаах өрөспүүбүлүкэтээҕи хамыыһыйа тэрээһиннээхтик үлэлээтэ. Бастаан, саас дьокутааттар Афанасий Петрович дойдутугар Хайахсыкка сылдьыбыттара, олохтоохтору кытта көрсүбүттэрэ. Бэс ыйыгар манна “Уунабын сибэкки дьөрбөтүн” диэн улуустааҕы ыһыах ыытыллыбыта, оттон төрөөбүт күнүгэр алтынньыга Хайахсыкка Афанасий Илларионов аатынан сквер уонна пааматынньык аһыллыбыта.
Мунньахха кыттыыны ылбыт Хайахсыт нэһилиэгин баһылыга Василий Прудецкай үбүлүөйдээх сылга уонна Афанасий Петрович аатын үйэтитиигэ үрдүк таһымҥа үгүс үлэни ыыталларын иһин Ил Түмэҥҥэ Махтал Суругу туттарда.
Манна даҕатан эттэххэ, Хайахсыт олохтоохторо Афанасий Петрович Илларионов аатын сүгэр орто оскуола саҥа дьиэтин тутууну туруорсалларын норуот дьокутааттара өйүөхтэрэ диэн эрэнэллэрин бу күн Афанасий Петрович кэргэнэ Венера Илларионова, Өрөспүүбүлүкэтээҕи Инвестиционнай хампаанньа генеральнай дириэктэрин солбуйааччы Иннокентий Аммосов, о.д.а. тыл этээччилэр бэлиэтээтилэр.
Олоҕун аргыһа, кэргэнэ Венера Егоровна уонна балта Клара Тарабукина быйыл Афанасий Петрович туһунан “Күн сирин үтүө киһи киэргэтэр” диэн дьоһуннаах кинигэни хомуйан оҥорбуттар. Сабыс-саҥа кинигэни сэтинньи 28 күнүгэр киэһээ Саха тыйаатырыгар буолбут, А.П.Илларионов төрөөбүтэ 75 сылыгар аналлаах өрөспүүбүлүкэ уопсастыбаннаһын киэҥ мунньаҕар кэлбит дьоҥҥо бука барыларыгар бэлэхтээтилэр.
Тэрээһиҥҥэ Ил Түмэн Бэрэссэдээтэлэ Александр Жирков, СӨ Бырабыыталыстыбатын Бэрэссэдээтэлин солбуйааччы Михаил Гуляев, Чурапчы улууһун баһылыга Андрей Ноговицын, норуодунай дьокутааттар, саха норуодунай суруйааччыта Сэмэн Тумат, Афанасий Илларионов соратниктара, бэтэрээннэр, биир дойдулаахтара, кэргэнэ Венера Егоровна, уола, Нерюнгри куорат судьуйата Петр Илларионов, о.д.а. кыттыыны ыллылар, тыл эттилэр, истиҥ-иһирэх ахтыылары оҥордулар.
Ил Түмэн спикерэ Александр Жирков өрөспүүбүлүкэ социальнай-экэнэмиичэскэй сайдыытыгар кылааттарын иһин үлэ бэтэрээннэригэр Гаврил Кузьмиҥҥа уонна Леонид Хоруновка Саха Өрөспүүбүлүкэтин Судаарыстыбаннай Мунньаҕын (Ил Түмэн) Бэрэссэдээтэлин Махтал Суругун туттарда.
Оттон Саха Өрөспүүбүлүкэтин Судаарыстыбаннай Мунньаҕын (Ил Түмэн) Афанасий Петрович Илларионов аатынан суруналыыстыкаҕа бириэмийэтин 2017 сылга лауреатынан Чурапчы улууһун “Саҥа олох” редакционнай-издательскэй холбоһугун дириэктэр-эрэдээктэрэ Афанасий Захаров буолла.
Саха норуотун чулуу уола, Ил Түмэн Бэрэстэбиитэллэрин палататын бастакы Бэрэссэдээтэлэ Афанасий Петрович Илларионов төрөөбүтэ 75 сылыгар аналлаах дьоһуннаах тэрээһин Афанасий Илларионов иэйиилээх хоһоонноругар ырыаларынан түмүктэннэ. Мустубут дьон ырыаһыт Анастасия Готовцева, Чурапчы күөрэгэйэ – Аграфена Кузьмина кэрэ куоластарын уонна опера, эстрада солистарын чаҕылхай толорууларын дуоһуйа-долгуйа иһиттилэр.
Татьяна МАРКОВА, edersaas.ru
Василий КОНОНОВ хаартыскаҕа түһэриилэрэ.