«Норуот маастара» номинацияҕа инники күөҥҥэ иһээччилэр ааттара билиннэ
«Саха сирин киэн туттуута» бириэмийэ «Норуот маастара» номинациятыгар финалистары талыыга куоластааһын бара турар.
Сүүмэрдиир куоластааһын түмүктэнэрэ икки хонук хаалла. Ол эбэтэр ыам ыйын 18 күнүгэр 16.00 ч. финалистар ааттара биллиэҕэ.
Бүгүҥҥү, ыам ыйын 16 күнүнээҕи туругунан, инники күөҥҥэ иһэллэр:
Василена Шарина, Амма улууһуттан бэйэ оҥоһугунан дьарыктанар маастар – 837 куолас, онтон 314 — социальнай ситимнэргэ;
Николай Степанов, Бүлүү улууһуттан норуот маастара – 822 куолас, онтон 472 — социальнай ситимнэргэ;
Василий Попов, Чурапчы улууһуттан норуот маастара – 767 куолас, онтон 508 —социальнай ситимнэргэ;
Мария Федорова, Чурапчы улууһуттан илиинэн оҥоһук маастара – 666 куолас, онтон 218 — социальнай ситимнэргэ;
Лидия Тимирдяева, Таатта улууһуттан норуот маастара – 645 куолас, онтон 215 — социальнай ситимнэргэ.
Уон бастыҥнар ахсааннарыгар норуот маастардара Мария Захарова, Саргылана Алексеева, Татьяна Карамзина, Татьяна Карсанаева, Николай Никитин уонна Мария Гаврильева ааттара баар.
Куоластааһын «Вконтакте», Фейсбук, Инстаграм социальнай ситиммнэргэ ыытыллар. Бастыҥтан бастыҥы талыы сүүмэрдээһин биэс финалиһыттан кыайыылааҕы талыы куоластааһына ыам ыйын 21 күнүттэн саҕаланыаҕа.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
Кытаатыҥ, өссө да бириэмэ баар. Бэйэҕит улуустаргыт маастардарын инники күөҥҥэ таһаарарга өйөбүл буолуҥ.
Елена ПОТОЦКАЯ, «Саха сирэ» хаһыат, edersaas.ru