Ньурба улууһун Малдьаҕар нэһилиэгэр аҕа оруолун үрдэтэр сыалтан быйылгы сыл Аҕа сылынан биллэриллибитэ.
Елена ПОТОЦКАЯ «Саха сирэ» хаһыат, edersaas.ru
Бу быһаарыныы мээнэҕэ ылыллыбатаҕа. Никита Иванов идэтинэн полиция үлэһитэ буолан, хайа күн баһылыгынан талыллыаҕыттан, нэһилиэгин уолаттарын иитиитигэр улахан болҕомтотун уурбута.
— Туох кистэлэ кэлиэй, кэлиҥҥи кэмҥэ уол оҕо күнү-күннээн көмпүүтэртэн уонна суотабайтан арахсыбат буолан, эт-хаан өттүнэн мөлтөх, туохха барытыгар ээл-дээл сыһыаннаһа улаатан иhэр. Ол иhин, уол оҕону олоххо эрдэттэн бэлэмниир соруктаах 2007 сыллаахха Никита Иванов уонна ол саҕана Малдьаҕар оскуолатын директорынан үлэлээбит Татьяна Иванова сүбэлэhэн баран, «Уолан» диэн байыаннай патриотическай лааҕыр тэрийбиттэрэ. Биэс сыл устата Никита Афанасьевич лааҕырга бэйэтинэн тахсан, оҕолору байыаннай дьыалаҕа уhуйбута.
Уолаттар сарсыардааҥҥы зарядкаттан саҕалаан, физическэй, строевой, тактическай бэлэмнэниигэ дьарыктаналлар. Күн аайы маҥан саҕаларын иhинэн тигиллэр «подшиваларын» суунан, өтүүктэнэн тиктэллэр. Быһата, аармыйа олоҕунан олорон, бирикээhи этиппэккэ толорор, нэрээккэ турар буолаллар. Онон уол оҕо кыра кылаастан оскуоланы бүтэриэр дылы сайын аайы сырыттаҕына, армияҕа толору бэлэмнээх киhи буолан тахсар, — диэн кэпсиир нэһилиэк бибилэтиэкэрэ Елена Иванова.
Лааҕыр сүрүн ситиhиитэ – уолаттар байыаннай сулууспаҕа туттуллар бастакы ирдэбилгэ үөрэнэн, дьиҥнээх эр киhи буола иитиллиилэрэ. Эт-хаан, өй-санаа өттүнэн биллэрдик сайдан, аармыйаҕа сулууспалаан кэлээт, ыччат баһылыкка тиийэн аармыйа олоҕор эрдэттэн бэлэмнээбитигэр махтал тылларын этэр.
Елена ПОТОЦКАЯ «Саха сирэ» хаһыат, edersaas.ru