Бүгүҥҥүттэн СӨ бырабыыталыстыбатын отчуота Ньурба улууһугар саҕаланна. Ол курдук, ОДьКХ уонна энергетикаҕа миниистирэ Гаврил Левин салайааччылаах бырабыыталыстыба делегацията үс бөлөххө арахсан үлэлээн эрэр. Түөрт күн устата үс бөлөх Ньурба улууһун 18 нэһилиэгэр барытыгар сылдьан, бырабыыталыстыба ааспыт сыллааҕы үлэтин уонна быйылгы былааны кэпсиэхтэрэ.
Александр Тарасов, «Саха сирэ» хаһыат, https://edersaas.ru/
Улуус таһымынан билиһиннэрэр буоллахха, энергетика боппуруоһа сытыытык турар. Олохтоохтор Сунтаар — Ньурба 220 күүрүүлээх уот ситимин тардыыны күүскэ туруорсаллар. Ньурбаҕа эдэр ыаллар олохсуйан, дьиэ-уот тутталларыгар уонна улуус үрдүнэн хапытаалынай тутуу барарыгар уот сүрүн кыһалҕа буолар.
Ньурба улууһун дьаһалтатын пресс-сулууспатын үлэһитэ Саргылаана Федорова быйылгы отчуот уратытын кэпсээтэ:
— Бырабыыталыстыба отчуотугар дьоҕус уларыйыы киирдэ. Урукку өттүгэр улуус кииниттэн ыраах сытар нэһилиэктэргэ биир бөлөх сылдьан отчуоттуур этэ. Быйыл оробуочай бөлөхтөр бары биир тэҥинэн ыраах уонна чугас нэһилиэктэргэ сылдьыахтара.
Хас да сыл устата туруорсубут боппуруостарбыт бааллар. Олортон билиһиннэрэр буоллахха, үрдүк күүрүүлээх уот ситимин тардыы буолар. Итини тэҥэ, нэһилиэннбэ Ньурба куоракка 240 миэстэлээх оҕо саадын тутуутун уонна авиапорка көтөр ааллар түһэр балаһаларын саҥардан оҥорууну туруорсар. Биллэрин курдук, авиапорт балаһата буор буолан, сайыҥҥы өттүгэр эрэйдээх соҕус.
Александр Тарасов, «Саха сирэ» хаһыат, https://edersaas.ru/