Ньурба улууһугар суол быһылааныгар оҕо суорума суолланна

Ааптар: 
Бөлөххө киир:

Бэҕэһээ, сэтинньи 23 күнүгэр, сарсыарда 06:00 чаас саҕана, «Бүлүү» федеральнай суолун 752-с км, Ньурба улууһун Марха үрэҕин таһыгар Мирнэйгэ айаннаан испит «Toyota Hiace» массыына түҥнэһиннэ. Бу туһунан быраабы араҥаччылыыр уорганнар иһитиннэрдилэр.

Бастаан утаа бу чахчынан холуобунай дьыаланы Ньурбатааҕы полиция силиэстийэлиир салаата тэрийбитэ. РФ Холуобунай кодексатын 264-с ыст. 3-с чааһынан, ол эбэтэр, суол быраабылатын кэһэн, сэрэҕэ суохтан киһини өлүүгэ тиэрдии бэлиэтэ баарынан. Онтон Ньурба улууһун борокуратуурата дьыаланы РФ Силиэстийэлиир кэмитиэтин Саха сиринээҕи управлениетын Ньурбатааҕы салаатыгар биэрбит.

Силиэстийэ бүгүҥҥү күҥҥэ сабаҕалыырынан, массыынаҕа олорсон испит 13 киһиттэн 13 саастаах уол оҕо өлбүт, 48 саастаах дьахтар хомурҕанын тоһуппут. Массыына хаһаайына уруулу И. диэн массыына ыытар дастабырыанньата, ол аата бырааба суох киһиэхэ туттаран баран, бэйэтэ сынньанаары утуйбут. Ону тэҥэ, массыына хаһаайына бэйэтэ дьону таһар көҥүлэ суох эбит.

ГИБДД иниспиэктэрдэрэ кинини массыына ыытар бырааба суох киһини уруулга олордубутун иһин административнай эппиэккэ тартылар. Оттон оҕо өлүүлээх суол быһылаанын таһаарыыга уорбаланар 26 саастаах киһини ити күн быстах кэмҥэ дьону тутар изоляторга хаайдылар. Аны силиэстийэ барар кэмигэр кинини 1 №-дээх Силиэстийэлиир изоляторга хаайар туһунан боппуруос көрүллэр.

Барыллааһын силиэстийэ кэмигэр массыына хаһаайынын дьайыытыгар РФ Холуобунай кодексатын 238-с ыстатыйатынан («Куттал суох буолуутугар эппиэттээбэт өҥөнү толоруу») көрүллэр буруй састааба баарын-суоҕун бэрэбиэркэлээн, процессуальнай сыанабыл биэриэхтэрэ. Бу дьыала силиэстийэтэ Ньурба борокуратууратын хонтуруолугар сылдьар.

Вера МАКАРОВА.

+1
0
+1
0
+1
0
+1
0
+1
0
+1
0
+1
0