Ааспыт нэдиэлэҕэ Сунтаар улууһугар Тойбохой сопхуос 50 сыллаах үбүлүөйүгэр аналлаах «Хаар айан – 2017» күрэхтэһии ыытылынна. Маныаха, Тойбохойго быйыл хаар чараас буолан, улууска алтыс төгүлүн ыытыллыбыт күрэcкэ, УАЗ массыыналар улахан харгыстары көрсүбэтилэр.
Анивера Акимова, «Саха сирэ» хаһыат, https://edersaas.ru/
Күрэхтэһиигэ Намтан, Өлүөхүмэттэн, Ньурбаттан, Сунтаартан уопсайа 18 хамаанда кыттан, бастыыр иһин илин-кэлин түһүстүлэр. Сүрүн бириис 100 тыһ. солкуобай туруоруллан, күрэхтэһиини ордук күүркэттэ. Биэс түһүмэхтээх күөн көрсүһүүгэ суол быраабылатын билиигэ, массыынаны киэргэтиигэ, автобиатлоҥҥа, буксирдаах айаҥҥа, «суперэкстрим» куоталаһыыга эрбии тииһин курдук эгил-тэгил кииристилэр.
Автобиатлон, буксирдаах айан түһүмэҕэр Кутана нэһилиэгин «Назад в СССР», Ньурбаттан «Темная лошадка» уонна Нам хамаандата барыларыттан ордук чорбойон, инники таҕыстылар. Оттон сүрүн түһүмэххэ эмиэ Ньурба улууһун «Темная лошадка» хамаандата бастаан, улуус баһылыга А.В. Григорьев туруорбут супер-бирииһин – 100 тыһ. солкуобайы илдьэ бардылар. Иккис миэстэҕэ Өлүөхүмэ «Росомаха», үһүскэ Ньурба «Антигелик» экстремаллара таҕыстылар.
Улуус баһылыгын көмөлөһөөччүтэ Тимур Иванов «Эдэр саас» сайтка: «Тэрээһин үрдүк таһымнаахтык ыытылынна. Уопсайа 36 суоппар кытынна. Күрэхтэһиини улуус дьаһалтата, Тойбохой нэһилиэгэ тэрийэн ыыттылар. Бастатан туран, чөл олоҕу пропагандалаан уонна спортивнай-экстремальнай сынньалаҥы сайыннарар сыалтан ыытыллар», – диэн кэпсээтэ.
Анивера Акимова, «Саха сирэ» хаһыат, https://edersaas.ru/