Кулун тутар бүтэһик күннэригэр Ньурба улууһун дэлэгээссийэтэ тыа сирин сайыннарыыга бастыҥ көрдөрүүлээх Нам уонна Чурапчы улуустарыгар сылдьан, уопут атастаста.
edersaas.ru
Намҥа I Хомустаах нэһилиэгэр «Дайар» сылгы кэпэрэтиибэ, «Күн тыкта» брендинэн мүөт оҥорор И.Солдатова тахсыылаахтык үлэлиир эбиттэр. Улуустааҕы «Эрэл» ТХПК (салайааччы К.Н.Протопопов) өрөспүүбүлүкэ көмөтүгэр тирэҕирэн, 1000 т хортуоппуйу, хаппыыстаны харайар кыһыҥҥы ыскылааты уонна күҥҥэ 23 сүөһүнү өлөрөн астыыр сыаҕы туттубут. Улуус дьаһалтатыгар тэриллибит көрсүһүүгэ Нам улууһун тэрилтэлэрин салайааччылара, дьокутааттара, нэһилиэктэрин баһылыктара ыалдьыттарга үлэлэрин-хамнастарын туһунан кэпсээтилэр, ыйытыыларга хоруйдаатылар. Бордоҥ нэһилиэгин баһылыга Наталья Петрова Эркээни үлэһит дьоннооҕун Маалыкайга олохсуйбут Нам улууһуттан төрүттээх Вера Соловьева холобуругар көрөрүн бэлиэтээтэ. Ньурба улууһун баһылыга Аркадий Иннокентьев Нам баһылыга Александр Атласов Тыа хаһаайыстыбатын уонна ас-үөл бэлиитикэтин миниистиринэн анаммытынан эҕэрдэлээтэ, бу улуус дьонун-сэргэтин ситиһиилээх үлэтин түмүгэ буоларын бэлиэтээтэ итиэннэ улуус баһылыгын э.т. Ефим Гоголевы кытары бииргэ үлэлииргэ эрэнэрин биллэрдэ.
Чурапчы улууһугар ыччаты тыа сиригэр олохтуурга улахан үлэ тэриллэрин Мугудайга «Чараҥ» агрокластер гааска холбоммут, толору хааччыллыылаах саҥа дьиэлэрэ кэпсииллэр. Бу бырагыраамаҕа кирбит эдэр дьон үксүлэрэ үрдүк үөрэхтээхтэр, сүөһү-сылгы иитиитинэн дьарыктаналлар. Үксүлэрэ олохтоохтор, ол эрээри Кэбээйиттэн, Хаҥаластан кэлбит ыччаттар эмиэ бааллар. Мугудайдааҕы аһылык кэмбинээтин улуус баһылыга Андрей Ноговицын уонна «Чурапчы» ТХПК салайааччы Николай Аржаков бэйэлэринэн арыаллаан көрдөрдүлэр. Бу кэмбинээти таһынан кэпэрэтиип Чурапчы сэл. уопсастыбаннай уонна оскуола оҕотун аһылыгын, халбаһы оҥорор, эти астыыр сыахтардаах, сылга 190 т эт, 7,6 тыһ. т үүт аһы, 230 т арыыны астыыр эбит. Даҕатан эттэххэ, Чурапчы улууһа сүөһүтүн-сылгытын ахсаанынан Мэҥэ Хаҥалас кэнниттэн өрөспүүбүлүкэҕэ иккис миэстэлээх. Улуус дьаһалтатыгар тэриллибит «төгүрүк остуолга» Андрей Ноговицын 2014-2020 сс. нэһилиэк олоҕун бары эйгэлэрин хабан сайыннарар «Кэпэрээссийэҕэ олоҕуран, Мындаҕаайыны кластерынан сайыннарыы» бырайыагы билиһиннэрдэ, балаһыанньатын уопут атастаһыытын бэрээдэгинэн ньурбаларга туттарда. Ньурба уонна Чурапчы улуустарын баһылыктара Саха сирэ сайдарын туһугар сибээстэрин быспакка биир санаанан үлэлииргэ сүбэлэстилэр.
Ньурбаттан Раиса НИКИФОРОВА, “Саха сирэ”, edersaas.ru сайтка анаан