Быйыл Ньурба улууһугар тыа хаһаайыстыбатын күнэ арыый уратытык уонна киэҥ бырагырааманан тэрилиннэ.
Ол курдук, бу күн ас-үөл дьаарбаҥката, агро-оскуолалар быыстапкалара, мелиорация сайдыытын боппуруостарыгар «төгүрүк остуол», Бааһынай ырыынагын аһыллыыта итиэннэ тыа хаһаайыстыбатын үлэһиттэрин үөрүүлээх мунньахтара буолла. Сарсыарда эрдэттэн Ньурба куораттааҕы «Кыталык» култуура киинигэр «Идэһэ-2018» быыстапка-дьаарбаҥка саҕаланна. Өрүс суола аһыллан, бары нэһилиэктэртэн кэриэтэ кэлбиттэр, онон кыттааччы да элбэх, атыылаһааччы да үгүс буолла. Кыайыылаах нэһилиэктэргэ уонна агро-оскуолаларга, эмиэ былырыыҥҥы курдук, улахан суумалаах бириэмийэлэр олохтононнор, бары үчүгэйдик оҥостон, тэринэн кэлбиттэр. Туох суоҕуй диэххэ айылаах, талбыт ас арааһа баар.
Быыстапка-дьаарбаҥка түмүгэ күнүстэн киэһэ, тыа хаһаайыстыбатын үлэһиттэрин мунньаҕар, таһаарылынна. Чаппанда нэһилиэгэ бастакы миэстэни ылан, 100 тыһ. солк. состоруулаах дипломунан наҕараадаланна. Иккис миэстэни Октябрьскай нэһилиэк, үсүһү Сүлэ нэһилиэгэ ыланнар, туһааннааҕынан 80 тыһ. солк., 60 тыһ. солк. бириэмийэлэннилэр. Агро-оскуолаларга Маалыкай орто оскуолата бастаан, 30 тыһ. солк. бириэмийэнэн наҕараадаланна. Иккис буолбут Сүлэ оскуолата, үһүс миэстэни ылбыт Хаҥалас оскуолата эмиэ харчынан бириэмийэни туттулар. Астыыр тэрилтэлэр ас көрүҥнэринэн күрэхтэстилэр.
Пушкин уулуссатыгар «Ньурба бэлэхтэрэ» диэн ааттаах эргиэн дьиэтэ, судургутук эттэххэ, Бааһынай ырыынага аһылынна. Улуус дьаһалтата 1 мөл. солк. көрөн, куонкурус ыыппытыгар, урбаанньыт Владислав Григорьев кыайыылааҕынан тахсан, бу ырыынагы оҥорон үлэҕэ киллэрдэ. Эти, балыгы, үүт астары атыылыыр сэттэ туочукалаах буолан, киһи наадыйарын барытын биир сиртэн атыылаһарыгар бэрт табыгастаах.
Геннадий Антонов, «Саха сирэ» хаһыат, edersaas.ru