Хортуоппуй туһунан интэриэһинэй чахчылар
Арассыыйаҕа хортуоппуй Бүөтүр Биэрэбэй ыраахтааҕы саҕана аҕалыллыбыта. Маҥнай декоративнай үүнээйи дии санаабыттар, Бөтөрбүүр мааны хотуттара сэлээппэлэрин хортуоппуй отунан, сибэккитинэн киэргэтэр эбиттэр.
Нуучча бааһынайдара бастаан хортоппуйу сиикэйдии сиэн баран, сирбиттэр. Кэлин “сир дьаабылыката” диэн сүрэхтээбиттэр. Ити кэмтэн ыла хортуоппуй Арассыыйа норуоттарын олоҕор-дьаһаҕар бигэтик киирбит, бу ас туһунан элбэх ырыа, частушка, өс хоһооно, таабырын, хоһоон айыллыбыт, бэл, өрө туруу буола сылдьыбыт (1840-с сс. Николай I саҕана бурдук кыайан үүммэтэҕэр былаас хортуоппуйу олордорго күһэйбитин сөбүлээбэккэ, бааһынайдар өрө турбуттара норуокка «Хортуоппуй бууна» дэммитэ).
Аан дойдуга үһүс миэстэ
Арассыыйа сылга ортотунан 30 мөл. туонна хортуоппуйу үүннэрэр, 1,5 мөл. туоннаны тас дойдуларга таһааран батарар. Оттон Саха сирэ сыллата 80-85 тыһ. туоннаны хомуйар.
Дойдуга муҥутаан үрдүк хомуур 2006 с. ылыллыбыта. Арассыыйа ити сыл 38,5 мөл. туоннаны хомуйан, Кытай уонна Индия кэннилэриттэн үһүс миэстэ буолбута.
Раиса Сибирякова, “Саха сирэ» edersaas.ru