Оҕо айымньытын Дыбарыаһын сорох куруһуоктара уһуйаан дьиэтигэр көһүөхтэрэ
Оҕо айымньытын Дыбарыаһын маҥнайгы этээһигэр “Кванториум” оҕо техно-паарката аһыллар үһү диэни истэн, үгүс сылларга оҕолор дьарыктанан кэлбит куруһуоктарын дьылҕата хайдах буолуон туһунан төрөппүттэртэн ыйытыы киирдэ.
edersaas.ru
Дьокуускай куораттааҕы Оҕо айымньытын Дыбарыаһын дириэктэрэ Марита Колодезникова: “Маҥнайгы этээскэ оҕо техно-паарката арылларынан сибээстээн, Дьокуускай куорат 88-с №-дээх уһуйааныгар куруһуоктары ыытарга миэстэ анаатылар, биир сылга”, — диэн эттэ.
Оҕо айымньытын Дыбарыаһын иккис этээһин сорҕотугар “Айыы кыһата” оскуола баар. Биллэрин курдук, быйыл сайын 203 микро-оройуоҥҥа “Айыы кыһата” оскуола сыбаайатын түһэрбиттэрэ. Оскуола эһиилги үөрэх дьылын көрсө саҥа дьиэҕэ киирдэҕинэ, куруһуоктар төттөрү Дыбарыаска көһөн кэлиэхтэрэ диэн, Марита Прокопьевна быһааран биэрдэ.
Онон куруһуоктары хайдах даҕаны тохтоппоттор, төттөрүтүн, “Саха КВН”, “Сэһэн” этнографическай хайысхалаах саҥа, туһалаах куруһуоктар баар буолбуттар. Дьарыктар балаҕан ыйын ортотуттан саҕаланыахтара диэн иһитиннэрдилэр.
Людмила ПОПОВА, “Саха сирэ” хаһыат, edersaas.ru