Оҕо босуобуйатын кээмэйэ үрдүөҕэ

Бөлөххө киир:

Алтынньы 12 күнүгэр СӨ бырабыыталыстыбата “Оҕо ыйдааҕы босуобуйатын туһунан” өрөспүүбүлүкэ сокуонун ырытыһан, уларытыылары киллэрэр туһунан сокуон барылын ылынна. Ол түмүгэр, оҕо босуобуйата 1,5 төгүл үрдүөхтээх. Бу миэрэ Ил Дархан кыаммат дьону өйүүр туһунан муус устар ыйдааҕы ыйааҕын чэрчитинэн ылылынна.

edersaas.ru

Босуобуйа кээмэйэ үрдээтэ буолан баран, ону олус кыра дохуоттаах ыаллар эрэ ылар кыахтаахтар.

Үлэ, социальнай көмүскэл миниистирэ Александр Михеев этэринэн, бу миэрэ көмөҕө олус наадыйар дьону чопчу өйүүргэ туһуланар. Холобур, дьиэ кэргэн ыйдааҕы дохуота хас биирдии киһитигэр тиксэринэн тиийинэн олоруу алын кээмэйин 30%-тан кыра буоллаҕына, үрдээбит босуобуйанан туһанар.

Сокуон олоххо киирдэҕинэ босуобуйа кээмэйэ уонна оҕолору сааһынан арааран аныыра уларыйар. Босуобуйа кээмэйэ дьиэ кэргэн ыйдааҕы дохуота хас биирдии чилиэнигэр тиксэринэн, тиийинэн олоруу алын кээмэйигэр төһө бырыһыаны ыларыттан тутулуктаах буолуоҕа.

Босуобуйа кээмэйэ маннык ааҕыллар:

1) дьиэ кэргэн ыйдааҕы дохуота хас биирдии чилиэнигэр тиксэринэн, тиийинэн олоруу алын кээмэйин 30% ылар;

2) тиийинэн олоруу алын кээмэйин 30–100%-гар тэҥнэһэр дохуоттаах дьиэ кэргэн.

Босуобуйа кээмэйэ 16 саастарыгар диэри оҕолорго барыларыгар биир буолуоҕа. Урукку курдук сааһынан араарыы суох. Арай киин уонна Арктика оройуоннарыгар олорор диэн араарыы баар. Ыйдааҕы босуобуйаны биир эрэ төрөппүт (эппэкиин, попечитель) ылар бырааптаах.

Билиҥҥи туругунан, оҕо босуобуйата 578-754 солкуобайга тэҥнэһэр. Маны тиийинэн олоруу алын кээмэйиттэн кыра дохуоттаах дьиэ кэргэттэр ылаллар. Оттон өрөспүүбүлүкэҕэ тиийинэн олоруу алын кээмэйэ иккис кыбаарталга 16603 солк. тэҥнэспитэ. Санатар буоллахха, бу кээмэйи (прожиточный минимум) өрөспүүбүлүкэ бэйэтэ олохтуур. Холобур, Арассыыйа атын регионнарыгар бу кээмэй икки төгүл кыра. 

Бу сылга өрөспүүбүлүкэҕэ оҕо босуобуйатыгар 1 млрд. 139 мөл. солкуобайтан тахса суумалаах үп көрүллүбүтэ. Босуобуйа кээмэйэ уларыйбытынан, 2018, 2019 сылларга өрөспүүбүлүкэ бүддьүөтүттэн эбии үп-харчы көрүллүөхтээх.

“Оҕо ыйдааҕы босуобуйатын туһунан” сокуон барылын Ил Түмэн мунньаҕар бу ый бүтэһигин диэки көрүөхтэрэ. Сокуон ылылыннаҕына, бэчээттэммит күнүттэн күүһүгэр киирэр.

Ангелина Васильева, “Саха сирэ” хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0