Саҥа дьыллааҕы бырааһынньык чугаһаан, ким бэлэх көрдүүр сүпсүлгэнигэр сылдьар, ким харчы оҥороору, бэлэми уорар.
Хаҥалас улууһугар баар Оҕо дьиэтин иитиллээччилэригэр анаммыт бэлэх сертификаттары уоруу тахсыбыт. Ол туһунан улуус полициятын дьуһуурунай чааһыгар Оҕо дьиэтин дириэктэрин солбуйааччы эрийэн эппит.
Кини иһитиннэрбитинэн, иитээччи хоһуттан уопсайа 15 тыһ. солк. сыаналаах 6 сертификаты уорбуттар. Бу сертификаттары үөрэхтэригэр ситиһиилээх оҕолорго туттарыахтаах эбиттэр.
Оперативниктар бу уорууга уорбаланааччыны туппуттар — бу Оҕо дьиэтин иитиллээччитэ, 17 саастаах кыыс эбит.
Барыллаан быһаарыынан, иитээччилэр хосторун хомуйа сылдьан, кыыс сертификаттар сыталларын өйдөөн көрөн, уорарга санаммыт. Ол ылан, дьүөгэлэригэр атыылыы-батара сатаабыт да, табыллыбатах.
Бу чахчынан «уоруу» ыстатыйанан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.