Мииринэйгэ 6 саастаах уолчаан оҕо саадыгар киирбэккэ, дьиэтин көрдөөн, куорат ортотугар диэри хааман тиийбит.
Ытыы сылдьар оҕону оптуобус тохтобулугар турар дьахтар өйдөөн көрбүт. Уонна кэлэн оҕоттон тоҕо ытыырын ыйыппытын, уолчаан дьиэтин көрдүүрүн туһунан эппит.
Дьахтар Мииринэй куорат аэропордугар диспетчеринэн үлэлиир буолан, оҕону үлэтигэр илдьэ барбыт. Онно тиийэн, транспортнай полиция дьуһуурунай чааһыгар биллэрбит. Манна линейнэй отдел сокуоннай сааһын ситэ илик оҕолор дьыалаларыгар иниспиэктэрдэр чэй иһэрдэн, бэчиэнньэ сиэтэн, оҕону уоскуппуттар уонна ханнык оҕо саадыгар сылдьарын ыйыппыттар.
Полицейскайдар ол оҕо саадыгар эрийэн, оҕо ийэлээх аҕата кимнээҕин билбиттэр. Сотору кэминэн тиэтэл бөҕөнөн уолуйбут көрүҥнээх төрөппүттэр уолларын ыла кэлбиттэр.
Оҕо аҕата кэпсээбитинэн, кини сарсыарда уолун оҕо саадыгар илдьибит уонна иһирдьэ киллэрбэккэ, группатыгар бэйэтэ бардын диэн, аан аттыгар хаалларбыт. Итинэн кини быйыл оскуолаҕа киириэхтээх оҕотун бэйэтин бэйэтэ көрүнэригэр иитэр-үөрэтэр үһү.
Уолчаан буоллар, иһирдьэ киирбэккэ эрэ, дьиэтин көрдөөн, ытыы-ытыы хаама сылдьарын ити дьахтар булан быыһаабыт.
Транспортнай полиция пресс-сулууспата иһитиннэрбитинэн, оҕо аҕатыгар РФ Административнай кодексатын 5.35-с ыст. 1 чааһынан, ол эбэтэр, төрөппүт эбээһинэһин толорбот буолуу бэлиэтэ баарынан, дьыала тэриллибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн