“Созвездие талантов” өрөспүүбүлүкэтээҕи ырыа куонкуруһугар коррекционнай оскуолаттан, интэринээт-оскуолаттан барыта 32 оҕо кыттыбыт.
Куонкуруһу “СӨ Үүнэр көлүөнэ тус сыаллаах пуондата” бырайыак чэрчитинэн, өрөспүүбүлүкэҕэ култуура уонна ускуустуба үлэһиттэрин айар түмсүүлэрэ тэрийдэ. Сыал-сорук оҕолор дьоҕурдарын арыйарга, кинилэргэ өйөбүл буоларга туһаайылынна.
Куонкурус эстрада ырыаһыта (соҕотох толоруу) уонна бөлөҕүнэн ыллааһын (дуэт, трио, ансаамбыл) хайысхаларынан ыытыллыбыт. СӨ култууратын үтүөлээх үлэһитэ Елизавета Попова бэрэссэдээтэллээх дьүүллүүр сүбэҕэ култуура туйгуна Маргарита Андросова, ырыаһыт уонна продюсер Антон Иванов, СӨ култууратын үлэһиттэрин айар түмсүүтүн салайар Жанна Капралова үлэлээбиттэр. Куонкурустаһааччы муусуканы төһө истэрин, тутуһарын, ырыаһыт куолаһа чөллөркөйүн, күүстээҕин, тембрын, сценаҕа хайдах туттарын-хаптарын, о.д.а. сыаналаабыттар. Долгутуулаах тэрээһин бары кыттыылаахтарын култуура уонна ускуустуба кэллиэһин дириэктэрэ, СӨ култуура уонна ускуустуба үлэһиттэрин айар түмсүүлэрин бэрэссэдээтэлэ Захар Никитин эҕэрдэлээбит, “Өркөн” ансаамбыл тэрээһини үҥкүүнэн киэргэппит.
Сынньалаҥҥа кэллиэс бастакы кууруһун бүтэрбит устудьуоннар кыттыбыттара улаханнык кэрэхсэммит. Кинилэр куонкурустаһааччылары оонньоппуттар, үҥкүүлэппиттэр, бэйэ-бэйэлэрин кытта доҕордоһуннарбыттар. Онон түһүлгэ бары кыттыылаахтарын сүргэлэрэ улаханнык көтөҕүллүбүт, көргө-нарга бары көхтөөхтүк кыттыбыттар. СӨ култууратын үтүөлээх үлэһитэ Ольга Стручкова култуурунай-маассабай оонньуулары тэрийэн ыытарга маастар-кылаас биэрбитэ улахан болҕомтону тардыбыт.
Түмүккэ түөрт оҕо Гран-при үрдүк аатын ылан үөрбүт. I,II,III истиэпэннээх лауреаттарга, дипломаннарга, о.д.а. кыттааччыларга бириистэр олохтоммуттар. Маны сэргэ, «Бастыҥ дебют», «Көрөөччүлэр биһирэбиллэрэ», «Сценаҕа бастыҥ көстүүм иһин» анал ааттар туттарыллыбыттар. Куонкуруһу СӨ Үүнэр көлүөнэ тус сыаллаах пуондата өйөөбүт, СӨ култуура уонна ускуустуба айар үлэһиттэрин түмсүүтэ, Дьокуускайдааҕы култуура уонна ускуустуба кэллиэһэ тэрийбиттэр.
Биһиги корр., «Саха сирэ» хаһыат, edersaas.ru
Хаартыскалар: Култуура уонна ускуустуба кэллиэһин архыыбыттан.