Сэтинньи 23 күнүгэр Оҕо дыбарыаһын 80 сылыгар анаммыт «Остров детского счастья» кинигэ сүрэхтэннэ.
edersaas.ru
Кинигэни СӨ бэтэрээннэрин педагогическай сүбэтин бэрэссэдээтэлэ Варвара Сергеевна Иванова-Зверева хомуйан уонна эрэдээктэрдээн таһаарда. Кинигэҕэ 150-тан тахса ахтыы, ыстатыйа киирбит. Ону сэргэ архыып матырыйааллара, хаартыскалар 1924 сылтан Пионер дыбарыаһыгар төһөлөөх элбэх учуутал үлэлээбитин, бу «Оҕо арыытыгар» төһөлөөх элбэх оҕо дьарыктаммытын сырдаталлар. 80 сыл иһигэр 12 дириэктэр үлэлээн ааспыт. 1953 сылтан дириэктэрдээбит, талааннаах тэрийээччи, оҕо уонна ыччат хамсааһыннарын салайааччы Фаина Иннокентьевна Авдееваҕа элбэх истиҥ-иһирэх ахтыы анаммыт. Билигин дириэктэринэн РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна Марита Прокопьевна Колодезникова үлэлиир.
Кинигэ сүрэхтэниитигэр Варвара Сергеевна Пионер дыбарыаһа маҥнайгы тэриллибит кэмигэр фондата суоҕун иһин, Национальнай архыып, хомсомуол пленумун, Үөрэҕирии министиэристэбитин оччотооҕу докумуоннарын туһаммытын туһунан кэпсээтэ.
ЫСПЫРААПКА:
Варвара Иванова-Зверева —— педагогическай энциклопедия 5 туомун, «От первых школ до наших дней» лиэтэпис-кинигэ ааптара.
«Учитель – интеллектуальный и духовный потенциал общества» уонна «Великое счастье – быть учителем» кинигэлэри хомуйан оҥорбута.
Марта НИКОЛАЕВА, edersaas.ru
