Оҕо эмтэнэригэр көмө наада

Бөлөххө киир:

Оҕо ыалдьара туохтааҕар да куһаҕан… Маннык түгэҥҥэ ордук төрөппүттэр кэлэр сирдэрэ кэлии үүтэ буолан, ханна, тугу гынары билбэккэ, тула холоруктаан хаалаллар. Тоҕус саастаах Саша Аржаков мэйиитигэр искэн тахсыбыт диэн этии чугас дьонугар этиҥ сааллыбытын курдук буолбута.

Быйыл саас Майатааҕы балыыһа, Медицинскэй киин быраастарын көмөлөрүнэн, Москваҕа Бурденко аатынан научнай-чинчийэр институт балыыһатыгар баран эпэрээссийэлэммиттэрэ. Ол эрээри, искэн мэйиигэ дириҥник өтөн киирбит буолан, барытын кыайан ылбатахтара.
Сашаҕа “диффузная астроцитома” 2-с стадията диэн диагноһы туруорбуттара. Икки эпэрээссийэни тулуйан, иккиһигэр коматтан нэһиилэ тахсыбыта. Ыам ыйыгар Москва куорат Морозовскай клиникатын реанимациятыгар киирбиттэрэ. Онно бу “диффузнай астроцитома” бэргээбитин бигэргэппиттэрэ уонна “эпилепсия”, “харах ньиэрбэтин атрофията” диэн эбии диагнозтары туруорбуттара.
Салгыы Арассыыйатааҕы Рентгенорадиология научнай киинигэр ыыппыттара. Ол эрээри, искэн атын сиринэн тахсан, тэнийэн иһэринэн, балыыһаттан таһааран баран, Москваҕа хаалан, кэмиттэн кэмигэр бэрэбиэркэлэнэллэригэр эппиттэрэ.
Билигин Саша ийэтин, аҕатын кытта Москваҕа бааллар, куортамнаан олроллор, хас нэдиэлэ аайы төлөбүрдээх МРТ-га түһэллэр.

Уһуннук реабилитацияны барыахпытын, лучевой эмтэниини ааһыахпытын наада. Ууга түһэн эрэр киһи оттон тардыһар дииллэринии, төрөппүттэр, туох баар кыаҕы туһана сатыыбыт. Оҕобут туруга хас күн аайы мөлтөөн иһэрин, ыарахан ыарыыттан эрэйдэнэрин көрөрбүт сүрдээх ыарахан. Киһи тылынан кыайан эппэт. Хас биирдии күнэ киниэхэ олус эрэйдээхтик ааһар. Тыына хаайтарарын, сатаан саҥарбат да буолан хааларын көрөн, сүрэхпит хаанынан ытыыр… Ордук, үппүт-харчыбыт тиийбэт буолан, ситэ көмөлөспөппүт диэн санаа ыар баттык буолар. Ол эрээри, арыый үчүгэй буолла да, Саша үтүөрэрин, оҕолору кытары тэҥҥэ оонньуу сүүрэрин ыралыыр.
Айыы киһитэ аһыныгас, күн киһитэ көмүскэс! Күндү дьоммут, биир дойдулаахтарбыт ыарахан түгэҥҥэ, алдьархайга аҥардастыы хаалларыахтара суоҕа, көмөлөһүөхтэрэ диэн эрэлбит улахан, — диэн Саша ийэтэ Альбина Павлова этэр.
Павловтар үс оҕолоохторуттан, Саша ортокулара. Бу күһүҥҥэ диэри оҕо-оҕо курдук, сүүрэн-көтөн, сайыны быһа лааҕырдарга атаарбыта. Футболунан үлүһүйэрэ, спордунан дьарыктанара. Ыллыыр, үҥкүүлүүр, үөрэҕэр үчүгэй этэ. Билигин да, үчүгэй буоллар эрэ, учебниктарын таһааран суоттуур, ааҕар. Ийэтэ учуутал, аҕата суоппар этэ, билигин уурайан, үлэлээбэт.
Сотору кэминэн Санкт-Петербурга барыахтаахтар. Онно Арассыыйаҕа соҕотох “ПЭТ-КТ” аппараакка түһүөхтээхтэр. Дьиэҕэ реанимация аппараата баар буолуохтаах, күн аайы сыаналаах эмтэргэ, кэлэргэ-барарга харчы бара турар. Павловтар бу эмтэнии көмөлөспөтөҕүнэ, омук сиригэр барыахтарын эмиэ баҕараллар. Германияҕа, Израильга эмтэнии сыаната ортотунан 3-4 мөл. солкуобай.
Кинилэр бастаан көмөлөспүт биир дойдулаахтарыгар уонна Хабенскай фондатыгар махталларын биллэрэллэр.

Саша Аржаковка хайдах көмөлөһүөххэ?
8914-296-7425 – мобильнай бааннаах төлөпүөн.
Сбербаан каартата – 4276760829222825. Павлова Альбина Андреевна.
“Алмаасэргиэнбаан” каартата – 4098880110753936.

Реквизиттэрэ:
Сбербаан Дьокуускай к. 8603 №-дээх отделениетыгар баар счет – 40817810676002011836,
ИНН 7707083893, БИК 049805609,
Корр. счет – 30101810400000000609.

+1
0
+1
0
+1
0
+1
0
+1
0
+1
0
+1
0