Тырааныспар полицейскайдара Дьоҕус суудуналарга судаарыстыбаннай иниспиэксийэ үлэһиттэрин кытта бииргэ 11 рейдэҕэ сылдьан, 47 суудунаны бэрэбиэркэлээбиттэр.
Уонна ол түмүгэр, оҥочонон дьону таһааччылар маннык кэккэ кэһиилэри таһааралларын булбуттар: оҥочону ыытар бырааптара суох, лицензиялара суох, быыһыыр сэлиэччиктэрэ суох биитэр ахсаана аҕыйах, оҥочолоро техническэй өттүнэн бэрэбиэркэлэммэтэхтэр, бэйэлэрэ буоллар күннэтэ доруобуйаларын туругун туоһулуур ыспыраапкалара эмиэ суох. Маннык чахчыларынан административнай дьыалалар тэриллэллэр.
Маны таһынан, РФ Холуобунай кодексатын 238-с ыстатыйатынан 3 дьыала тэриллибит. Бу ыстатыйаҕа куттал суох буолуутун ирдэбиллэригэр эппиэттээбэт табаары, бородууксуйаны оҥорон таһаарыы, харайыы, тиэйии, батарыы, оннук үлэни, өҥөнү оҥоруу иһин эппиэтинэс киирэр.
Ол курдук, Тырааныспар полициятын Мииринэйдээҕи салаатын үлэһиттэрэ Ньурба улууһугар 2 оннук чахчыны булбуттар. Бастакы түбэлтэҕэ, муус бара турар кэмигэр, 52 саастаах киһи Марха өрүһү туоратаары, икки киһи олороругар анаммыт эрэһиинэ тыытыгар түөрт киһини уочаратынан олордубут.
Маныаха кини өрүс муустан босхоломмут сиринэн эрэ таһар буолан, онтон атынын дьон бэйэтэ сатыы туоруур эбит. Олохторугар куттал суоһуурун үрдүнэн. Бу өҥөтүн иһин биирдии киһиттэн төлөбүрүн 300 солк., ол эбэтэр, уопсайа 1200 солк. ылбыт.
Ону таһынан, өҥөнү көҥүлэ суох оҥорооччу дьоҕус суудунаны (оҥочону) ыытар бырааба да суох, быыһыыр сэлиэччиктэрэ да суох эбит.
Иккис түбэлтэ РФ Куттал суох буолуутун федеральнай сулууспатын Саха сиринээҕи управлениетын сотрудниктарын кытта бииргэ рейдэлээһин кэмигэр булуллубут. Бу сырыыга 33 саастаах киһи “Казанка” тыытынан Түүкээн үрэҕи уочаратынан аҕыс киһини туораппыт. Бу эдэр киһи эмиэ дьоҕус суудунаны ыытар бырааба уонна быыһыыр сэлиэччиктэрэ суох, тыыта иниспиэксийэҕэ бэлиэтэммэтэх, ону ааһан, онон-манан алдьаныылаах эбит. Куттал суох буолуутун ирдэбиллэригэр ханан да эппиэттээбэт өҥөтүн иһин уопсайа 3500 солк. ылбыт.
Оттон үһүс холуобунай дьыала Томпо улууһугар тэриллибит. Манна 49 саастаах киһи Алдан өрүһү “Вельбот-55” диэн алта эрэ киһи батар оҥочотунан биир сырыытыгар 20 киһини туораппыт. Эмиэ инники икки дьыалаҕа курдук, бу киһи өҥөнү көҥүлэ суох оҥорооччу дьоҕус суудунаны ыытар бырааба суох, быыһыыр сэлиэччиктэрэ суох, оҥочото иниспиэксийэҕэ бэлиэтэммэтэх, техническэй бэрэбиэркэни барбатах.
Маны таһынан, оҥочотун мотуора сөп түбэспэт, аһара күүстээх кыамталааҕы туруорбут, онтун дьиҥнээх характеристикатын кистээбит. Бу киһи куттал суох буолуутун ирдэбиллэригэр ханан да эппиэттээбэт өҥөтүн иһин уопсайа 12000 солк. ылбыт.
Санатар буоллахха, РФ Холуобунай кодексатын 238-с ыстатыйатынан көрүллэр накаастабыл миэрэ – аччаабыта ыстараап, улааппыта — 2 сылга диэри көҥүлү быһыы.
Вера МАКАРОВА, «Саха сирэ» хаһыат, edersaas.ru
Хаартыска: УВДТ пресс-сулууспата.