Киһи оҕо да сылдьан, эдэр да сылдьан, этэргэ дылы, акаары сааһыгар, уһуну-киэҥи соччо-бачча ыраҥалыы барбат, үрдүнэн көтүөккэлиир буоллаҕа. Онно-манна сылдьан-аралдьыйан, сүтэн-оһон хааллахха да, бу дьонум күүтэн, көрдөөн, долгуйан эрдэхтэрэ диэн долоҕойго тиэрдии суох буоллаҕа.
Вера МАКАРОВА, «Саха сирэ» хаһыат, edersaas.ru
Дьэ, оннук сүтэн хаалбыт обургу оҕолору, өйдөрүн туппут улахан да дьону полиция холуобунай ирдэбилин оперативниктара түүннэри-күнүстэри көрдүүллэр. Бу сүтээччилэр чугас дьонноро айманан, араас куһаҕаны барытын санаан, утуйар уулара көтөн, аһыыр астара умнуллан, бүтэр уһугар ыксаан, полицияҕа көмө көрдөөн кэлэр буоллахтара.
Ааспыт өрөбүллэргэ оннук хас да «сүтүк» көһүннэ. Эрдэ эппиппит курдук, бу үксүгэр олоххо оттомо суохтук сыһыаннаһар, көрү-нары, күүлэйи батыһар дьон. Оттон оҕолор биитэр дьиэлээхтэрин кытта кыыһырсыы, өйдөспөт буолуу түмүгэр эбэтэр төрөппүт өттүттэн хонтуруол суоҕуттан бэйдиэ баран хаалаллар.
Биир оннук сүппүт 13 саастаах уолу «Туймаада» атыы-эргиэн-аралдьытар киинтэн иккис сууккатыгар булбуттар.
15 саастаах кыыс эмиэ иккис сууккатыгар көстүбүт.
14 саастаах кыыһы төрдүс сууккатыгар, доҕотторун кытта сылдьарын булбуттар.
Улахан да дьон хаалсыбат: 40-чалаах киһи атаһын кытта арыгылыы сылдьарын, 22 саастаах кыыс эмиэ итирдэр утаҕынан үлүһүйэ-күүлэйдии сылдьарын, чугас дьонноро тыыннаах көстөллөрүгэр эрэллэрэ сүтэн эрдэҕинэ булбуттар.
27 саастаах дьахтар кэргэнин кытта кыыһырсан баран, «иэстэһээри» дьиэтиттэн тахсан барбытын, дьүөгэтиттэн булбуттар.
Чугас, күндү, таптыыр дьонун итинник соруйан эрэйдиир биитэр бэйэлэрэ олохторугар итинник эппиэтинэһэ суохтук сыһыаннаһар дьон ааранан полицияҕа эбии ноҕорууска тэбэн биэрэр буоллаҕа үһү!
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.