Алтынньы 1 күнүгэр – Аҕам саастаахтар күннэринэн, кырачааннар тыыл бэтэрээнигэр соһуччу бэлэх оҥордулар. Уус Алдан Бороҕонугар ыкса сытар, урут тигинээн-таҕынаан олорбут Томтортон төрүттээх, 89 саастаах Анастасия Ивановна Васильева үөрүүтэ улахан.
Билиҥҥитэ төһө да оҕолоро таһыттан көрөн-истэн олордоллор, бэйэтин көрүнэн, адах адаҕата буолбатарбын диэн, бэйэтин дьаһанан, бу бэлиэ күҥҥэ дьиэтигэр чуҥкуйан олорор түгэнигэр күүтүллүбэтэх соһуччу эҕэрдэ киниэхэ улахан үөрүүнэн, кэрэ бэлэҕинэн буолла.
Ол курдук, икки биэстии киилэлээх бурдуктаах, биэстии киилэлээх саахар, ириис, мокуруон бакыаттаах, дьиэҕэ астаммыт бааҥкалаах лечоттан, барыанньаттан, чэйигэр, кэмпиэтигэр, бэчиэнньэтигэр, кэнсиэрбэтигэр, мас арыытыгар, үүтүгэр тиийэ, онтон да элбэх араас ас тутуурдаах, эҕэрдэ хоһооннордоох, бып-бычыгырас кыракый оҕолор салайааччыларын кытта биирдэ кутулла түспүттэр. Бу кырдьаҕаска умнуллубат, долгутуулаах, үөрүүлээх, соһуччу бэлэх буолла. Кини төһө да аһын-үөлүн биэнсийэтинэн бэйэтэ хааччынан олордор, күүстээх болҕомтоттон, үтүө дьыалаттан, истиҥ сыһыантан дууһата сырдаата.
Аҕата сэрии кэмигэр үлэ фронугар баран эргиллибэтэх, элбэх оҕолоох аҥаардас ийэҕэ хаалан аччыктааһыны этинэн-хаанынан билбит киһиэхэ маннык быһыы суолтата өссө улахан. Ол иһин аһы хаһаана үөрэммит. Даачатын инбэлиит уолунаан билигин да тутан олорон, хортуоппуйунан, оҕурсуунан, помидорунан хааччынар эбит. Килиэптэрин духуопкаҕа халыыпка кутан, маҕаһыын киэниттэн ордуга диэн, доруоһата суох аһытыынан оҥостон сииллэр эбит. Иккиэн 6 куулу ылыммыттар. Онто, суоттаан көрдөххө, маҕаһыынтан ылардааҕар үс төгүл барыыстаах диир.
—Ол дьыала барыыһыгар буолбатах, ол кэннэ күн аайы килиэп, ас ылынарга төбөм ыалдьыбатын курдук, кыстыыр аспын ылынан хааччынабын. Билигин аны ити кэһии бөҕө кэлэн, аны аҕыйаҕы ылынар буоллахпыт, — диэн тыыл бэтэрээнэ, сэрии тулаайаҕа үөрүүтүн үллэһиннэ. — Онон үйэбэр ылбатах кэһиини тутаммын, бу хаһыат нөҥүө Дьокуускай куорат 31-с нүөмэрдээх оскуола 1-кы “е” кылааһын үөрэнээччилэригэр, учууталларыгар төрөппүттэригэр барҕа махталбын тиэрдэбин.
Ангелина Васильева, “Саха сирэ” хаһыат, edersaas.ru