Хотугулуу-Илиҥҥи федеральнай университекка Иркутскайдааҕы судаарыстыбаннай университет Педагогикаҕа институтун гуманитарнай-эстетическэй үөрэххэ салаатын филологияҕа уонна методикаҕа кафедратын бэрэпиэссэрэ Ирина Сосновская актовай лиэксийэтэ буолан ааста.
Истээччилэр – учууталлар, Дьокуускай куорат оскуолаларын мэтэдиистэрэ, устудьуоннар уонна ХИФУ преподавателлэрэ.
Учуонай оскуола үөрэнээччилэрин ортолоругар ааҕыыга интэриэстэрин кэтээн көрүү түмүгүн үллэһиннэ итиэннэ кэлин оҕолор фэнтезини аҕыйатан, дьиҥнээх олохтон ылыллыбыт литэрэтиирэни ааҕан эрэллэрин бэлиэтээтэ. “Оҕо литэрэтиирэтэ XX үйэ 20-с сылларыгар баар буолбута. Корней Чуковскай, Самуил Маршак, Лидия Чарская айымньылара оҕолор куттарын туппута. Оҕо литэрэтиирэтэ биһигини бөҕөргөтөр, өйбүтүгэр-санаабытыгар иҥэн хаалар, дууһаны таарыйар”, — диэн бэрэпиэссэр Ирина Сосновская этэр.
Ураты оҕолор, туоратыллыы, сымыйалааһын, өлүү-сүтүү, дьиэ кэргэн уонна оскуола проблемалара оҕо айымньыларыгар таарыллар сытыы тиэмэлэринэн буолалларын ыйар. Лиэксийэҕэ оҕо литэрэтиирэтин саҥа дьоруойдарын – араас социальнай араҥа (“неформаллар”), дьонтон-сэргэттэн тэйбит дьон, буруйу оҥорооччулар, уо.д.а. араҥа туһунан кэпсээтэ. Бэрэпиэссэр уруогу таһынан ааҕыыларга Марина Москвина «Не наступите на жука», Борис Минаев «Детство для Левы», Ирина Краева «Баба Яга пишет», Анджела Нанетти «Мой дедушка был вишней», о.д.а. айымньыларга болҕомтолорун ууралларыгар ыҥырда.
ХИФУ пресс-сулууспата.