Экология сылын чэрчитинэн, бу күннэргэ Дьокуускай куорат «Сияние Севера» оҕо уһуйааныгар араас тэрээһиннэр ыытылыннылар.
Арассыыйаҕа бэлиэтэнэр Татыйык күнүгэр сөп түбэһиннэрэн, оҕо саадын иитиллээччилэрэ чыычаах уйаларын оҥорон ыйаатылар уонна Саха сиригэр кыстыыр көтөрдөр тустарынан элбэҕи биллилэр-көрдүлэр.
Бу тэрээһиннэр оҕо кыра сааһыттан айылҕаҕа харыстабыллаахтык сыһыаннаһарыгар иитэн-такайан таһаарарга ананаллар.
Эмиэ бу күн «Үтүө санаа» диэн тиэмэҕэ оҕолорго анал уруок ыытылынна. Уруокка өрөспүүбүлүкэ саамай үтүө санаалаах ыччата – Антон Васильев ыалдьыттаата. Дьоҥҥо үтүөнү оҥоруу кини олоҕун суолтатынан буолбутун туһунан Антон кэпсээбитин оҕолор сэҥээрэ иһиттилэр.
Бу кэнниттэн оҕолор дьиэлэригэр төрөппүттэрин кытары оҥорбут чыычаах уйаларын ыйаатылар.
Маны таһынан, «Сияние Севера» уһуйаан үлэһиттэрэ элбэх оҕолоох ыалларга аһынан-үөлүнэн көмө оҥордулар.
Надежда Анабарская, «Эдэр саас» сайтка анаан