Бу күннэргэ Дьокуускай куорат национальнай гимназиятын 10 “а” кылааһын (кылаас салайааччыта Күндэлиинэ Трофимовна Кириллина) 16 үөрэнээччитэ Хара муора кытылыгар Анапаҕа барда.
edersaas.ru
Кинилэр Бүтүн Арассыыйатааҕы «Смена» оҕо киинигэр «Арассыыйа Президенин күрэҕэ” диэн ааттаах Арассыыйа үөрэнээччилэрин дьоһун спортивнай күрэхтэһиитигэр, култуурунай тэрээһинигэр кытта сылдьаллар. Кинилэри гимназия физкультураҕа учуутала Татьяна Леонидовна Крылова уонна алын кылаас учуутала Наталья Михайловна Максимова кыһамньылаахтык көрөллөр-истэллэр, тустаах сүбэлэри биэрэллэр.
Дойду эргиччи сайдыылаах оҕолорун түмэр маннык улахан күрэхтэһии Анапаҕа 1999 сылтан ыытыллар буолан, билигин үтүө үгэстэрдээх бэртээхэй тэрээһиҥҥэ кубулуйда. Ол аата күрэхтэһии Краснодарскай кыраай сиригэр-уотугар ыытыллыбыта быйыл 20-с сыла буолар.
Үрдүк таһымнаах, сомоҕолоох буолууну эрэйэр бу күрэхтэһиигэ Арассыыйа 80 регионуттан 149 хамаанда кэлбит. Кинилэр ортолоругар өрөспүүбүлүкэбитин аар саарга ааттатар хоту дойду хоһуун санаалаах оҕолоро бааллар. Күүһү-уоҕу, тобуллаҕас өйү, талааны көрдөрүүгэ биһиги оҕолорбут атын регион оҕолоруттан харыс да хаалсыбакка, бары түһүмэхтэргэ бастыҥнар кэккэлэригэр сылдьыахтарыгар, өрөспүүбүлүкэбит былааҕын күөрэччи көтөҕүөхтэригэр, бэрт ситиһиилээхтик кыттыахтарыгар бигэ эрэллээхпит.
Оҕолорбутугар кыайыыны, хотууну, ситиһиини баҕарабыт!
Ольга АФАНАСЬЕВА, «Саха сирэ» хаһыат, edersaas.ru