Оҕолорго сурутууну хото бэлэхтээтилэр

Ааптар: 
Бөлөххө киир:

Бу күннэргэ Арассыыйаҕа Оҕо саас Уон сылын чэрчитинэн «Сахамедиа» холдинг медиа-киинигэр «Оҕолорго сурутууну бэлэхтээ» диэн аһымал аахсыйа буолан ааста.

edersaas.ru

Аахсыйаны «Кэскил» Оҕо бэчээтин кыһата уонна «Рапост» хампаанньа салалталара тэрийдилэр.

Тэрээһин кыттыылаахтара «Кэскил», «Юность Севера», «Колокольчик», «Чуораанчык» оҕо таһаарыыларын оскуолаларга, оҕо саадтарыгар, оҕо дьиэлэригэр, элбэх оҕолоох дьиэ кэргэттэргэ суруттардылар.

Ил Түмэн спикерэ Петр Гоголев, Ил Түмэн дьиэ кэргэҥҥэ уонна оҕоҕо сис кэмитиэтин бэрэссэдээтэлэ Алена Атласова, куорат мээрэ Сардаана Авксентьева,  министиэристибэлэр салайааччылара, «Кэскил» Оҕо бэчээтин кыһатын доҕотторо, оҕо хаһыаттарын араас сыллардааҕы көхтөөх эдэр кэрэспэдьиэннэрэ уопсайа 500 экз. оҕо таһаарыыларыгар сурутууну оҥордулар.

Оҕо хаһыаттара уонна сурунааллара олус баай ис хоһоонноохтор. Онон оҕо билиитэ-көрүүтэ сайдыытыгар оруоллара сүҥкэн. Сурутуу кэмигэр актыыбынай кыттыыны ылан, эһиги биһиги оҕолорбутугар тугунан да кэмнэммэт духуобунай баайы бэлэхтээтигит, — диэн  «Кэскил» Оҕо бэчээтин кыһатын салайааччыта Анжелика Андреева тэрээһин кыттыылаахтарыгар  махтанна.

Кэрэхсэбиллээҕэ баар, биирдиилээн салайааччылар оҕо тэрилтэлэригэр аһымал аахсыйаҕа кыттыбакка да сылдьан суруталлар. Ол курдук, бу күннэргэ Өймөкөөн улууһун Томтор нэһилиэгинээҕи Власий Кривошапкин аатынан Оҕо дьоҕурун сайыннарар искусство оскуолатын иитиллээччилэригэр анаан «Сахамедиа» холдинг генеральнай дириэктэрин солбуйааччы Афанасий Ноев «Саха сирэ» уонна «Кэскил» хаһыаттары суруттаран баран, квитанциялары оскуола салайааччытыгар хаартыскаҕа түһэрэн ыыппыт.

Билбэт нүөмэрим батсаапка Сахабыт сиригэр кыһын кэлбитинэн эҕэрдэлээн баран, хаһыаттар квитанцияларын ыыппыт этэ. Кэлин кини кимин билбитим. Оҕолор уонна кэлэктиибим аатыттан Афанасий Ивановичка истиҥник махтанабыт, — диэн махталын тиэрдэр Оҕо дьоҕурун сайыннарар  искусство оскуолатын дириэктэрэ Галина Петрова. 

«Кэскил» хаһыаты уонна «Чуораанчык» сурунаалы өймөкөөннөр олус сөбүлээн суруталлар. Аатырбыт меценат-атыыһыт Николай Кривошапкин аатынан  орто оскуола алын сүһүөх кылааһын учуутала Агафья Готовцева кылааһын оҕолоругар анаан эрэдээксийэҕэ бэйэтигэр суруттарар уонна нэдиэлэ аайы таксистарынан ыллаттарар. Онон кини почта үлэтигэр кыһаллыбакка, оҕолоругар хаһыаттарын уонна сурунаалларын кэмигэр тиэрдэр.

Оттон Өймөкөөн нэһилиэгин баһылыгынан үлэлээбит Рустам Кривошапкин («Кэскили» уонна «Чуораанчыгы» таһыыга элбэхтик үлэлэспитэ) «Кэскил» хаһыат бочуоттаах доҕорунан буолбута ыраатта. Рустам Гаврильевич, төһө да куоракка олордор, билигин да хаһыаты төрөөбүт Өймөкөөнүн кытта ыкса сибээстии сылдьар. Кини «Кэскил» хаһыат суруналыыһа Жанна Леонтьева тэрийэр Тымныы полюһугар аналлаах бары тэрээһиннэригэр көхтөөхтүк кыттар.

«Кэскил» Оҕо кыһата тэрийбит аһымал аахсыйатыгар  кыттан,  бастакы учууталым Агафья Готовцева аатыгар үс оҕоҕо анаан суруттардым. Агафья Степановна сурутууну кимиэхэ аныырын бэйэтэ быһаарыаҕа, — диэн кэпсиир Рустам Кривошапкин.

«Рапост» ХЭТ «Кэскил» Оҕо бэчээтин кыһатын хаһыаттарыгар уонна сурунаалларыгар сурутууну салгыы www.rapost.info  сайтыгар тэрийэн ыытар. Онно ханнык да докумуону толорбокко, хаһан баҕарар сайтка киирэн сурутуохха сөп. «Рапост» нөҥүө суруттардахха, Тиксиигэ да, Дьокуускайга да биир тэҥ сыананан сурутаҕыт.

 

Аһымал аахсыйа ахсынньы бүтэһик күннэригэр диэри ыытыллар. Онон хас биирдии киһи иитиллэн тахсыбыт оҕо саадыгар, оскуолатыгар, эбии үөрэхтээһин тэрилтэтигэр «Кэскил» Оҕо бэчээтин кыһатын хаһыаттарын уонна сурунаалларын сурутан, кырачааннарга уонна оскуола оҕолоругар бэртээхэй Саҥа дьыллааҕы бэлэҕи оҥоруон сөп.

Елена ПОТОЦКАЯ, «Саха сирэ» хаһыат,  edersaas.ru

Хаартыска — «Кэскил» Оҕо бэчээтин кыһатын архыыбыттан.

+1
0
+1
0
+1
0
+1
0
+1
0
+1
0
+1
0