Атырдьах ыйын 17-20 күннэригэр оҕолору иитэ ылар дьиэ кэргэҥҥэ анаммыт «Дьиэ кэргэн – биһиги сылаас дьиэбит» өрөспүүбүлүкэтээҕи бэһис форум ыытыллыаҕа.
Надежда ЕГОРОВА, «Саха сирэ» хаһыат, edersaas.ru
СӨ Үөрэх уонна Үлэ министэристибэлэрэ тэрийэр форумнарыгар биһиги дойдубутугар дьоллоох оҕолор элбииллэрин туһугар элбэҕи оҥорор үтүө санаалаах, кыһамньылаах дьон мустуохтара. Маннык форумнарга түөрт сыл иһигэр 84 дьиэ кэргэн (106 төрөппүт, 240 оҕо) кытынна.
Форум кэмигэр юридическай, психологическай уонна социальнай боппуруостарга сүбэлэри-амалары сэргэ, «Олох оскуолата» технология» тренинг, «Эппиэтинэстээх төрөппүт» өрөспүүбүлүкэтээҕи куонкурус буолуохтара. Форум бырагыраамата олус киэҥ. Бу кэм устатыгар дьиэ кэргэттэр бэйэ-бэйэлэрин кытары чугастык билсиэхтэрэ, үөрүйэхтэрин атастаһыахтара.
Оҕолор эмиэ бириэмэлэрин туһалаахтык атаарыахтара. Кинилэр «Виктория» оҕо лааҕырын исписэлиистэрэ ыытар араас куруһуоктарыгар, маастар-кылаастарыгар, сынньалаҥ киэһэлэригэр сылдьан, элбэҕи билиэхтэрэ-көрүөхтэрэ, туһаны ылыахтара.
Ону сэргэ, улахан болҕомто оҕону дьиэ кэргэҥҥэ иитэ ылар төрөппүттэри уонна оҕолору кытары быһаччы үлэлиир муниципальнай сулууспалар исписэлиистэригэр ууруллуоҕа.
ЫСПЫРААПКА:
Судаарыстыба ыытар бэлиитикэтин көмөтүнэн Саха сиригэр сыл аайы оҕону дьиэҕэ иитэ ылар дьиэ кэргэттэр ахсааннара элбии турар.
2010 с. тулаайах уонна төрөппүт көрүүтэ-истиитэ суох хаалбыт 240 оҕо 92 ыалга иитиллибитэ.
2017 с. 218 ыал 609 оҕону иитэр.
Дьиэ кэргэҥҥэ обургу саастаах оҕолору, бииргэ төрөөбүттэри, инбэлиит уонна доруобуйаларыгар хааччахтаах оҕолору иитэ ылыахха сөп.
Надежда ЕГОРОВА, «Саха сирэ» хаһыат, edersaas.ru