Үйэттэн ордук кэм устата өрөспүүбүлүкэҕэ хаачыстыбалаах педагогтары бэлэмниир кырдьаҕас үөрэх кыһата — Дьокуускайдааҕы педагогическай колледж “Мозайка” оскуола иннинээҕи үс тылынан үөрэтэр бөлөҕү арыйан үлэлэтэн эрэр.
Людмила Попова, “Саха сирэ” хаһыат, https://edersaas.ru/
Бу туһунан СӨ Үөрэҕин уонна наукатын миниистирэ Владимир Егоров Россия Бэчээтин күнүнэн сибээстээн, суруналыыстары кытта көрсүһүүтүгэр кэпсээтилэр. Ааспыт сыл бэс ыйын 1 күнүттэн 20 миэстэлээх уопсай сайыннарар хайысхалаах бөлөҕү арыйбыттар. Бу бөлөх атыттартан уратыта диэн — бүгүҥҥү күн ирдэбиллэригэр эппиэттиир, үөрэх аныгылыы бырагырааматынан үлэлиир. Кэлин атын омук тыллара олохпутугар өтө киириилэрэ үксээтэ, күннээҕи олохпутугар хото туттуллар буолла. Оҕолорбут улааталларыгар өссө биллиэ турдаҕа.
Кырачааннар сахалыы саҥаралларын таһынан, нуучча уонна английскай тылы үөрэтэллэр. Анисия Скрябина сэбиэдиссэйдээх уопуттаах иитээччилэр, оҕолор көннөрү саҥарар эрэ буолбакка, үс тылынан тэҥҥэ толкуйдуур уонна быһаарсарга үөрэтэр бырагыраамаларын аттарбыттар.
С.Ф.Гоголев аатынан Дьокуускайдааҕы педагогическай колледж оскуола иннинээҕи салаатын сэбиэдиссэйэ, “Мозайка” оскуола иннинээҕи бөлөх методиһа Анисия Скрябина: “Өскөтүн оҕо хас даҕаны омук тылынан тэҥинэн быһаарсар эйгэҕэ иитиллэр буоллаҕына, кини ол тыллары баһылыырыгар уустугу көрсүбэт. Маныаха тылбаастыыр, быһаарар наадата суох. Оҕо туох баар өйүнэн-санаатынан, иэйиитинэн оннук буолуохтааҕын курдук ылынар. Оттон улахан киһи атын омук тылын үөрэтэригэр лингвистическэй систиэмэтигэр баар, ол тылга ханыылыы, сөптөөх тылы буларга дьулуһар. Онон кырачааннар икки эбэтэр хас даҕаны саҥа омук тылын тэҥҥэ үөрэтэр дьоҕурдаахтар”, – диэн санаатын үллэһиннэ.
Тустаах колледж дириэктэрэ Ирина Любимова суруналыыстарга бу үөрэх сылын бырайыактарын билиһиннэрдэ. Бөлөххө туһаныллар тэриллэр, оонньуурдар барыта үөрэх аныгы технологиятын ирдэбиллэригэр эппиэттииллэрин эттэ. “Мозайка” бөлөх сыала биир – оскуолаҕа киириэн иннинээҕи саастаах оҕо интэриэһин тардан, үөрэниэн баҕарар көҕүн үрдэтии, онно бэлэмнээһин”, – диэн дириэктэр быһааран биэрдэ.
Кырачааннар иннилэригэр эмиэ үрдүк ирдэбил турар. Ол курдук, күүстээх педагогтары бэлэмнээһиҥҥэ кинилэр эмиэ хайа эрэ өртүнэн кыттыгастаах курдук буолаллар. Ол эбэтэр колледж бэйэтин иһинэн оскуола иннинээҕи бөлөҕү арыйан, устудьуоннар ыраата барбакка, бэйэлэрин олорор дьиэлэрин үрдүгэр оҕолору кытта алтыһар уонна маҥнайгы уопуту ылар кыахтаахтар. Кэнэҕэски иитээччилэр, муусука салайааччылара манна кэлэн быраактыкаларын баралларыгар кыах үөскээтэ.
Ити курдук колледж икки куобаҕы тэҥинэн өлөрөр бэртээхэй бырайыагы олоххо киллэрбит: оскуола иннинээҕи бөлөҕү арыйаллар итиэннэ бэйэлэрин устудьуоннара харыс да халбарыйбакка уопут ылар усулуобуйаларын олохтууллар. Маны сэргэ педагогическай колледж бырайыага быраактыка хайысхалаах семинардары, өрөспүүбүлүкэ учууталларын таһымнарын үрдэтэр куурустары ыытарга саҥа кыахтары арыйар.
Людмила Попова, “Саха сирэ” хаһыат, https://edersaas.ru/