Мөлүйүөнүнэн харчыны дьиэлэригэр, ыскааптарыгар ууруна сылдьар дьон билигин да баарыттан киһи сөҕөр.
Ол курдук, Ленскэй полициятын дьуһуурунай чааһыгар биир дьахтар эрийэн, дьиэтиттэн бөдөҥ суумалаах харчыта сүппүтүн иһитиннэрбит — 1 мөл 200 тыһ. солк, 1000 евро уонна 1000 дуоллар.
Уоруу тахсыбыт аадырыһыгар тиийбит оперативниктарга дьахтар быһаарбытынан, харчытын таҥас ыйыыр ыскаабыгар ууруна сылдьыбыт. Сибэкки атыылыыр бизнеһинэн дьарыктанар буолан, онтугар дьиэ (помещение) атыылаһаары мунньуна сылдьыбыт харчыта эбит.
Холуобунай ирдэбил оперативниктара уорууга уорбаланааччыны сотору кэминэн туппуттар — бу эдэр дьахтар бииргэ олорор киһитэ, Иркутскай уобаластан төрүттээх 24 саастаах киһи эбит. Уоруйах үс күнүнэн дойдутугар көтөөрү сылдьыбыт…
Уорбаланааччы билиммитинэн, ыскаапка бакыакка суулана сылдьар харчыны алҕас булбут. Бастаан 300 тыһ. солк. ылан, кирэдьиитин саппыт. Сорох харчытынан интэриниэт нөҥүө макбук сакаастаабыт, ордугун бэйэтин счетугар ууруммут.
Оттон дьахтар уорууну өйдөөн көрбөтөҕүттэн эр ылан, харчытын барытын сойботон, дойдутугар бараары тэриммит. Ленскэйгэ кини вахтовай ньыманан үлэлээбит буолан, аны бу куоракка тутуллара суох эбит.
Дьахтар буоллар, таптыыр киһим харчыбын уорбута буолуо диэн түһээн да баттаппатах. Өссө бэйэлээх бэйэтин оҕотун, 15 саастаах уолун, уорбалыы сылдьыбыт.
Бу чахчынан РФ Холуобунай кодексатын 158-с ыст. 4-с чааһынан, ол эбэтэр, бөдөҥ сууманы уоруу бэлиэтэ баарынан, дьыала тэриллибит. Бу 4-с чааһынан көрүллэр накаастабыл миэрэ — 10 сылга диэри көҥүлү быһыы.
Бу туһунан СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.