Бокуруоп күнэ үүнэн, кыһын чугаһаан, бу өрөбүллэргэ «Сайсары» бааһынай ырыынагар оҕуруот аһынан хааччынаары киһи ап-аалыҥнас.
edersaas.ru
Манна чугастааҕы Уус Алдан, Хаҥалас, Нам улуустарын хаһаайыстыбалара бородууксуйаларын батара кэлбиттэр. Онон хаачыстыбатынан да, сыанатынан да талар кыах баар. Балаҕан ыйын ортотугар хаппыыста – киилэтэ 35 солк. эбит буоллаҕына, билигин – 20 солк.
Нам Бартыһаанын уолаттара хаппыыстаны киилэтин 18 солк. атыылыы тураллар. «Тоҕо сыаната атыттартан чэпчэкиний?» – диэн ыйыппыппар:
– Элбэҕэ бэрт, атыылаан бүтэрэ охсуохпутун наада, – дииллэр. Хата, «сыананы алдьатаҕыт», диэн мөҕүллүбэттэр эбит дуу дии санаат, салгыы оҕуруот аһын атыттар төһөҕө атыылыылларын үөрэттим.
Уус алданнар сүбүөкүлэлэрин киилэтин 50 солк., Хаҥалас дьөппөннөрө моркуоптарын 55 солк. атыылыы турар буолан, кинилэр аттыларыгар уочараттаан турааччылары көрдүм. Оттон ол дьон аттыгар моркуоп киилэтэ 60 солк. атыыланар. Онон 5 солк. да быһаарар оруоллаах эбит. Сорох оҕуруот аһа, төһө да ыанан бүттэр уонна тоҥнор, син биир атыыга «анньыллан» сытар…
Ырыынак диэх курдук, массыына үрдүттэн да атыылааччы баар, хортуон дьааһыгар симпит да баар. Сүрүннээн хортуон дьааһыкка угуллубут оҕуруот аһа дэлэй.
Быйыл хаппыыста үүнүүтэ үчүгэй. Онон да сыана биллэ түстэҕэ — куула ортотунан 700 солк.
Улуустартан аҕалыллыбыт оҕуруот аһа хаачыстыбатынан биллэ ордуга харахха быраҕыллар. Онон бу күннэргэ дьон оҕуруот аһын кыһыҥҥыга хото хаһаанар.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.