Балаҕан ыйын 30 – алтынньы 1 күннэригэр Дьокуускайга ыытыллыбыт Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр көҥүл тустууга Х норуоттар икки ардыларынааҕы турнир кыайыылаахтара Николай Охлопков уонна Герман Устинов “Норуоттар икки ардыларынааҕы кылаастаах спорт маастара” үрдүк аакка түһэриллиэхтэрэ. Бу туһунан СӨ Спортивнай тустууга федерациятыттан иһитиннэрдилэр.
edersaas.ru
Онуоха Гран при серия таһымнаах Коркин турнира Арассыыйа Спорка министиэристибэтин итиэннэ Тустуу аан дойдутааҕы холбоһуктаах түмсүүтүн (United World Wrestling) былааныгар киирэрэ чиҥ төрүөт буолар.
Бары билэргит курдук, Дмитрий Коркин онус үбүлүөйдээх түһүлгэтигэр 57 киилэлээхтэргэ сүүрбэ биир саастаах Николай Охлопков чаҕылхайдык бастаабыта.
Оттон Герман Устинов 70 киилэҕэ диэри ыйааһыҥҥа түмүк хапсыһыыга Армения ааттааҕын Хачатур Папикяны “лаампа” диэн сөбүлээн туттар албаһыгар түбэһиннэрэн эргитэн кулахачытан кылбардык бастаабытын тустууну сэҥээрээччилэр өргө диэри умнубаттара буолуо.
ЫСПЫРААПКА
Баар балаһыанньа быһыытынан, “Норуоттар икки ардыларынааҕы кылаастаах спорт маастара” аат 16-тан итэҕэһэ суох омук дойдута кыттыылаах күрэхтэһиигэ бастаабыт бөҕөскө иҥэриллэр. Оттон Дьокуускайга ыытыллыбыт түһүлгэҕэ, иһитиннэриллибитин курдук, 26 дойду бөҕөстөрө аҕыс ыйааһыҥҥа күөн көрсүбүттэрэ.
P.S. Санатар буоллахха, былырыыҥҥы Дмитрий Коркин IX түһүлгэтин түмүгүнэн Ньургун Александровка уонна Егор Пономаревка “Норуоттар икки ардыларынааҕы кылаастаах спорт маастара” аат иҥэриллибитэ.
Роман ПОПОВ, «Саха сирэ» хаһыат, edersaas.ru