//Дьокуускай куоракка охсуһуук боруодалаах ыт 4 саастаах кыыска саба түһэн улаханнык эмсэҕэлэттэ
Дьокуускай куорат полициятын пресс-сулууспата иһитиннэрбитинэн, от ыйын 2 күнүгэр Каландарашвили уулусса оройуонугар иччитин кытта сылдьар ыт ийэтин кытта ааһан иһэр кыракый кыыска саба түһэн эчэппит. Оҕо өлбөт быатыгар чугастыы полиция үлэһитэ сылдьыбыт. Ытын сатаан туппатах хаһаайканы Cэргэлээх полициятын пуунугар илдьэн быһаарыы сурук суруйтарбыттар.
Түөрт саастаах кыысчааҥҥа моонньугар, санныгар биэс тигиини оҥорбуттар.
Куораппыт уулуссаларын устун анал томторуга (наморднига) суох сылдьар ыттаах дьону элбэхтэ көрөбүн. Бу кыһалҕа күн бүгүнүгэр диэри бэрээдэктэнэ илигин сөҕөбүт эрэ.
Бэлиэтээн эттэххэ, 2014 сыллаахха өрөспүүбүлүкэбитигэр бэйдиэ сылдьар ыттары дьиикэй кыылга тэҥниир саҥа сокуон ылыллыбыта. Ол сокуон ылыллыыта Тиксии оройуонугар буолбут оҕо өлүүлээх куһаҕан быһыы-майгы түмүгэ этэ.
Хомойуох иһин, билигин хаһаайына суох бэйдиэ сылдьар ыт ахсаана куораппытыгар өссө да элбэх. Оннооҕор хаһаайыннара баарына саба түһэн киһини эчэтэр ардай аһыылаахтар эгэ, элбэх буолан сырыттахтарына киһини сиэхтэрин даҕаны сөп курдук.
Бэйдиэ сылдьар уонна хаһаайыннаах даҕаны ыттар саас, күһүн ииригирэн нэһилиэнньэҕэ кутталлаахтар. Урукку өттүгэр төһөлөөх киһи ыкка ытыттарбыта, төһөлөөх оҕо уйулҕатыгар охсууну ылбыта буолуой? Хайа муҥун, быһаарыллар кэм кэллэ. Охсуһуук боруодалаах ыттары көҥүл күүлэйдэтэр, томторуга суох сырытыннарар син биир иитиилээх сааны уулуссаҕа илдьэ сылдьар кэриэтэ буоллаҕа. Саа хаһан эстэн кими эчэтиэ биллибэтин курдук, бу охсуһарга, өлөрсөргө анаан төрөөбүт ыт өйүгэр туох көтөн түһэрэ биллибэт.
Охсуһуук боруодалаах ыттарынан анаан дьарыктанар түмсүү баар эбит. Кулууп бэрэссэдээтэлэ Дмитрий Костромитин социальнай ситимнэргэ эппит санаатын кытта сөпсөспөт элбэх. Кини: «Питбуль боруодалаах ыт сааһа биирэ, кини өссө да эдэр. Куһаҕан, дьоҥҥо саба түһэр адьыната суох этэ» диэн быһаарыыта ыт оҕоҕо саба түһүүтүн кытта дьүөрэлэспэт.
Оҕо олорор сиригэр-уотугар холкутук, куттаммакка сылдьарыгар ыраас, сырдык, куттала суох эйгэни оҥоруохтаахпыт. Оҕону ытырбыт ыты өлөрүөхтэрэ. Ол эрээри хаһаайка маннык боруодалаах ыты саҥаттан иитэн томторуга суох куоракка күүлэйдэтиэ суоҕа диэн ким да мэктиэлээбэт. Хантан, кимиэхэ туох боруода ыт кэлэн саба түһүө биллибэт. Сокуон кытаатыан, суут иннигэр ытырбыт ыттаах хаһаайын толору эппиэттиэхтээх. Оттон уулуссаҕа бэйдиэ сылдьар ыттары куорат дьаһалтата дьаһайыахтаах!
Ульяна ЗАХАРОВА.