П.А.Ойуунускай аатынан судаарыстыбаннай- литературнай мусуойга
«Норуоттар доҕордоһуулара – литературалар доҕордоһуулара» диэн
литературнай-музыкальнай тэрээһин буолла.
edersaas.ru
Уопсастыбаннай уонна судаарыстыбаннай диэйэтэл, уһулуччулаах суруйааччы, учуонай-лингвист П.А.Ойуунускай төрөөбүтэ 125 сылыгар аналлаах бу тэрээһиҥҥэ кэлбит дьон суруйааччы, филологическай наука кандидата Анна Гоголева «П.Ойуунускай – саха уһулуччулаах суруйааччыта, бэйиэт, судаарыстыбаннай диэйэтэл, лингвист-учуонай» лиэксийэтиттэн элбэҕи иһиттилэр.
Н.Е.Винокуров-Урсун П.А.Ойуунускай тылбаастаммыт айымньыларын ааҕааччыларга арыйда. Кини кэпсээбититтэн ыалдьыттар Таатта үтүө сиригэр үктэммит, Ойуунускай балаҕанын, үөрэммит оскуолатын уонна суруйааччыны кытары сибээстээх өйдөбүнньүк миэстэлэргэ сылдьыбыт курдук сананнылар.
Куорат оскуолаларын үөрэнээччилэрэ П.А.Ойуунускай айымньыларыттан быһа тардыылары аахтылар, атын омуктар литератураларын, култуураларын билистилэр.
Ону сэргэ, «Аан дойду норуоттарын эпостара уонна остуоруйалара» уонна фольклорист, филологическай наука кандидата Иннокентий Пухов тус пуондатыттан быыстапка тэрилиннэ.
Дьаһалга араас норуоттар бэрэстэбиитэллэрэ – Манасчи Азиз Байке (киргиз), Людмила Фролова (финка), Абдужабор Самадович (таджик) кытыннылар. Дьокуускайдааҕы педагогическай колледж устудьуонката Света Черемкина “һээдьэни” эбээннии тылынан толордо.
ХИФУ нуучча тылын кафедратын устудьуоннара бэйэлэрин тылларынан П.А.Ойуунускай хоһооннорун ааҕан, улаханнык сөхтөрдүлэр.
Ван Шаньшань, Харбин:
—Мин Платон Ойуунускай төрөөбүтэ 125 сылыгар аналлаах бырааһынньыкка кыттыбыппыттан олус үөрэбин. Кини «Кытай норуотугар» хоһоонун кытайдыы ааҕыым – миэхэ улахан чиэс. Бүгүн манна сахалыы тойугу уонна оһуохайы сэҥээрдим. Хаһан да көрбөтөхпүн көрөн ис дууһабыттан үөрдүм, умнуллубат өйдөбүнньүк хаалла.
Ван Вэньцзин, Кытай:
— Биһиги дойдубут култууратын көрдөрдүбүт уонна Саха сиригэр олорор норуоттар култуураларын үрдүктүк сыаналаатыбыт. Кыттыбыт дьон төрөөбүт тылларынан айымньылары хайдах курдук үөрэн-көтөн, долгуйан туран ааҕалларыттан санаабыт көтөҕүлүннэ. Онон, сахалар култуураларын туһунан өссө элбэҕи билиэхпин баҕардым.
Кондо Сатоси, Япония:
— Сахалар уонна японнар хомустарыгар оонньоотум. Олус долгуйдум эрээри, бу алыптаах инструменнарга оонньооһун миэхэ эмиэ улахан чиэс. Өссө эбээн тылынан ырыа мин сүрэхпин күүскэ таарыйда.
Хонг Утэк, г. Ыйджонбу, Корея Өрөспүүбүлүкэтэ:
— Бастатан туран, миигин бу тэрээһиҥҥэ ыҥырбыккытыгар улахан махталбын тиэрдэбин. Мин П.Ойуунускай аатын урут элбэхтик истэр этим, ол гынан баран, кини улуу киһи буоларын бүгүн биллим. Саха тылын билбэтэрбин да, сахалар бэйэҕит суруйааччыгытыгар тапталгытын, ытыктабылгытын өйдөөтүм.
Ямадзаки Юсуке, Япония:
— «Норуоттар доҕордоһуулара – литературалар доҕордоһуулара» тэрээһин көмөтүнэн араас норуоттар үгэс буолбут култуураларын билистим. Биһигини ыҥырбыккытыгар махтанабын.
Лена Федорова,Марха 1 №-дээх орто оскуола IV «Б» кылааһын салайааччыта:
—— Биһиги бары 1922 с. байыаннай таҥаһы таҥынныбыт, уолаттарбыт «буденовка» бэргэһэ кэттилэр, кыргыттарбыт кыһыл былаат мааннылар.
Иллээх-эйэлээх уонна көхтөөх кылааспытыгар элбэх омук (нуучча, молдаван, татар, бурят, саха) бэрэстэбиитэллэрэ үөрэнэллэр. Оҕолорбутун хардарыта бииргэ көмөлөсүһүү курдук сэдэх хаачыстыба холбуур. Мусуойу кэрийэн көрөн, саха чулуу уолун олоҕун уонна айар үлэтин туһунан элбэх туһалааҕы биллибит.
ххх
Ити курдук, Сомоҕолоһуу күнүгэр Саха сиригэр олорор норуоттар бэрэстэбиитэллэрэ саха чулуу уола П.А.Ойуунускай аатын үйэтитиигэ ураты кылааттарын киллэрдилэр.
Ангелина КУЗЬМИНА, «Саха сирэ» хаһыат, edersaas.ru