Төһө да 21-с үйэ буоллар, сорохтор баҕа өттүлэринэн («отшельники»), сорохтор кыһалҕаттан ойуурга олохсуйааччылар билигин да бааллар. Сунтаар улууһугар оннук олорор киһини туттулар. Тугу оҥорбутун иһин?
Биир сарсыарда Сунтаар Ис дьыалаҕа отделыгар 46 саастаах киһи эрийэн, кини хас да күҥҥэ дьиэтиттэн барбыт, суох кэмигэр, бэнсиининэн үлэлиир эрбиитин уонна бородууктатын уорбуттарын эппит.
Оперативниктар быһылаан тахсыбыт сиригэр тиийэн көрбүттэрэ — уоруйах иһирдьэ дьиэ верандатын истиэнэтин көтүрэн киирбит.
Бу уорууга уорбаланааччыны полицейскайдар суукка иһинэн булбуттар — урут массыынаны күрэтэн сууттана сылдьыбыт 44 саастаах киһи эбит. Дьэҥдьиир кэмигэр киниттэн уоруллубуттан сороҕун булбуттар.
Барыллаан быһаарыынан, уорбаланааччы дьиэлээх хаһаайын Бүлүү улууһугар ойуур баһаарын умуллара барбытын, хойут кэлиэхтээҕин бэркэ диэн билэр эбит. Онон, биир түүн кэлэн, веранда сорох истиэнэтин көтүрэн, дьиэҕэ киирбит.
Уорбут эрбиитин 1300 солк. батарбыт, оттон аһы-үөлү тыаҕа кистээбит.
Уорбаланааччы оҥорбутун билиммитин ааһан, олорор сирэ, дьиэтэ-уота суох буолан, ойуурга олорорун кэпсээбит.
Билигин бу чахчынан процессуальнай бэрэбиэркэ барарын СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.