Дьокуускай куорат Октябрьскай уокуругун бэтэрээннэрин сэбиэтин бэрэссэдээтэлэ Валентина Иннокентьевна Петрова туһунан сырдатыахпын баҕарабын. Кини салалтатыгар «Камелёк» кулууп, «Певческие посиделки», «Педагог» уонна соторутааҕыта тэриллибит «Сүүтүк» куруһуок киирэллэр.
«Педагог» кулуупка учууталлар сылдьаллар. Ол курдук, В.И. Петрова, Т.Д. Сыроватская, М.И. Николаева, М.Е. Степанова, С.Д. Неустроева, С.В. Стручкова араас хайысхаларынан арахсан үлэлииллэр. Бу кулууп 2008 сыллаахха тэриллибитэ. Кинилэр аҕам саастаах дьону түмэн, сэрии кыттыылаахтарын, огдооболорун, үлэ, тыыл бэтэрээннэрин уонна инбэлииттэри кытта үлэни тэрийэллэр. Холобура, профилакторийга сытар дьону кэрэҕэ, сырдыкка угуйуу, викториналары таайтарыы уо.д.а. Аны кулууппут чилиэннэрэ бары талбыт курдук ырыаһыттар эбит. «Чэбдик», «Хоту», «Абырал» профилакторийдарга, реабилитационнай кииҥҥэ тиһигин быспакка сылдьаллар, саастаахтары көрсөллөр. Онно баар дьон «учууталлар кэлэллэр» диэн үөрүү-көтүү бөҕө буолаллар. Учууталлар былыргыттан инники күөҥҥэ сылдьар дьон буоллахтара. Чахчы дьону сырдыкка ыҥыраллар, холобур буолаллар. Кинилэр истэригэр Федора Николаевна Егорова «хаамыска, хабылык» диэн муннукка ытаабыт кэрэ аҥаар баар. Кини — «Мир увлечений» кулууп уонна «Сүүтүк» куруһуок кытыылааҕа. Профилакторийга тиийэн саха былыргы оонньуутун тарҕатар, күрэхтэһиилэри тэрийэр.
Соторутааҕыта Октябрьскай уокурукка куорат дьокутааттарын көмөлөрүнэн үөрүүлээх түгэн буолла. Икки эдэр киһи — Степан Ильич Павлов уонна Алексей Андреевич Осипов ураты бэлэҕи оҥордулар. Кинилэр биир да харчыны эрэйбэккэ, управление дьиэтигэр баар кырдьаҕастар мустар аактабай саалаларын өрөмүөннээн биэрдилэр. Үлэ түмүгүнэн сааланы үөрүүлээх быһыыга-майгыга арыйыы сиэрэ-туома буолла, лиэнтэни быстылар. Уолаттарбыт өссө да көмөлөһө туруохпут диэн тылларын биэрдилэр.
Бу барыта Валентина Иннокентьевнабыт үтүө хамсааһыннара буолаллар. Үөрүүлээх арыллыыга салайааччыбыт арааһынай куоталаһыыны, ырыаны-тойугу, викторинаны тэрийдэ. Бу курдук Октябрьскай уокурук бэтэрээннэрэ саастаахтар күннэрин умнуллубаттык бэлиэтээтибит.
«Ньурбачаан», edersaas.ru сайтка анаан.