Быраабы араҥаччылыыр уорганнар үлэлэрэ ол-бу бэлиэ күннэртэн, бырааһынньыктартан тутулуга суох. Онон, Саҥа дьыл да үүнэрэ чугаһаатын — өссө биир улахан айдааннаах буолар сибикилээх холуобунай дьыаланы тэрийдилэр
Вера МАКАРОВА, «Саха сирэ», https://edersaas.ru/
Буолаары буолан, РФ Силиэстийэлиир кэмитиэтин Саха сиринээҕи управлениетын салайааччыта, генерал Олег Мезрин бэйэтэ тэрийдэ. Ньурба улууһун баһылыга Борис Поповка. РФ Холуобунай кодексатын 286-с ыст. 3-с чааһын «в» пуунунан, ол эбэтэр, ыарахан содулу аҕалан туран, дуоһунас боломуочуйатын аһара барыы бэлиэтэ баарынан.
Силиэстийэ сабаҕалыырынан, Борис Попов 2015 сыл ыам ыйыгар «О контрактной системе в сфере закупок товаров, работ, услуг для обеспечения государственных и муниципальных нужд» диэн федеральнай сокуон ирдэбилин кэспит. Бу сокуон контрактары толорууга кинилэр усулуобуйаларын биллэрдик уларытыыны бобор. Попов контракт хайа да өрүтэ буолбакка сылдьан, дьаһалга сокуоннайа суохтук илии баттаабыт. Ол дьаһал ис хоһооно — Күндээдэ сэлиэнньэтигэр оскуоланы тутуу бэдэрээтчитигэр тутуу бастакы түһүмэҕин толоруу иһин эрдэттэн 38 мөл. солк. сууманы төлөбүр.
Маныаха силиэстийэ дааннайынан, бу дьыл ахсынньы 23 күнүнээҕи туругунан, 176 оҕо үөрэниэхтээх оскуолатын тутууга үлэ барбатах. Ону ааһан, тутуу өссө 2015 сыл балаҕан ыйыгар тохтотуллубут. Бэдэрээтчит 17 мөл. 700 тыһ. солк. кэриҥэ суумалаах эрэ үлэни толорбут.
Билигин суһал-ирдиир тэрээһиннэр ыытылаллар. Холуобунай дьыала Ньурба улууһун борокуратууратын уонна СӨ ИДьМ-тын экономическай буруйдары уонна коррупцияны утары охсуһар управление ыыппыт бэрэбиэркэлэригэр олоҕуран тэрилиннэ.
Манна даҕатан эттэххэ, ИДьМ урукку миниистирэ, генерал-майор Яков Стаховка холуобунай дьыала эмиэ оруобуна бу ыстатыйанан тэриллэн баран, кэлин «а» пуунугар уларытыллан (сымнаан), бу соторутааҕыта эрэ амнистиянан буруйу боруостааһынтан быыһанан турардаах.
Оттон чопчу бу Борис Попов дьыалатын туһунан эттэххэ, кини уорбаланар ыстатыйатын накаастабыл миэрэтэ 3 сылтан 10 сылга диэри көҥүлү быһыы эрээри, дьыала иһэ хараҥа — суут бириигэбэрэ сокуоннай күүһүгэр киириэр диэри киһи буруйа суоҕунан ааҕыллар. Баҕар, дьыала суукка тиийиэ да суоҕун сөп.
Вера МАКАРОВА, «Саха сирэ», https://edersaas.ru/
Хаартыска: ЯСИА