Ааспыт субуота күн Сунтаар нэһилиэгэр «Чебурашка» оҕо сайдар киинин тиэргэнигэр тымныы халлааны аахсыбакка, аҕаларга бэрт сэргэх күрэс буолла. Хас биирдии хамаанда бэйэлэригэр аат, анал таҥас толкуйданан, эмбилиэмэлэрин туппутунан параадтаан, күрэстэрин үөрүүлээх түгэҥҥэ арыйдылар. edersaas.ru
Алта хамаанда хоккейга, хайыһарга, биатлоҥҥа кыахтарын холоннулар. Кыттааччыларга итии чэйдээх алаадьы күүстэригэр эбии күүс эптэ. Кырачаан оҕолор ийэлэрин, эбэлэрин кытта кэлэн, тэҥҥэ долгуйан, кыттааччыларга бэртээхэй ыалдьааччылар буоллулар.
Түмүк
Биатлоҥҥа Д.Н. Еремеев («Кулунчук» хамаандата) бастаата. М.М. Слюсарь («Куобахчаан») иккис, К.А. Уаров («Сулусчаан») үһүс миэстэ буоллулар. Хоккейга 1-кы миэстэни «Күнчээн», 2-с миэстэни»Күбэйэ», 3-с миэстэни «Туллукчаан» хамаандалара ыллылар.
Оттон уопсай түмүккэ хамаандалар маннык миэстэлэри үллэһиннилэр:
1-кы миэстэ — «Кулунчук», 2-с миэстэ — «Күнчээн», 3-с миэстэ — «Куобахчаан», 4-с миэстэ — «Сулусчаан», 5-с миэстэ — «Туллукчаан», 6-с миэстэ — » Күбэйэ».
Кыайыылаах «Кулунчук» хамаанда 3 тыһ. солк. суумалаах сертификатынан наҕараадаланна.
Бу күрэхтэһии, биһигиттэн төһө эмэ ыраах да буоллар, Пхенчхан куоракка ыытылла турар кыһыҥҥы олимпиадаҕа уонна кэлэн иһэр Аҕа дойду көмүскээччилэр күннэригэр анаан, мини-олимпиада быһыытынан олус сэргэхтик ааста. Көхтөөх аҕалар, эһэлэр өрөбүллэрин сибиэһэй салгыҥҥа сүүрэн-көтөн туһалаахтык атаардылар. Төрөппүттэри түмэр бэртээхэй тэрээһини толкуйдаан, тэрийэн ыыппыт уһуйааммыт үлэһиттэригэр махтанабыт.
Юлия Алексеева.