Ахсынньы 8 күнүгэр Госдумаҕа МОК Арассыыйа хамаандатын Соҕуруу Кореяҕа буолар кыһыҥҥы Олимпийскай оонньууларга кытыннарбат, Арассыыйа Олимпийскай кэмитиэтин ууратар туһунан быһаарыытын сүнньүнэн Дуума бэрэссэдээтэлин солбуйааччы, Арассыыйа Олимпийскай кэмитиэтин салайааччыта Александр Жуков дакылаатын дьүүллэһиэхтэрэ.
Онно Госдума туох быһаарыы ылыныа биллибэт. Бу иннинэ Госдума дьокутаата, Олимпиада чөмпүйүөнэ Светлана Журова өскөтө МОК Арассыыйа сүүмэрдэммит хамаандатын Олимпиада аһыллыытыгар кытыннарбат, РФ гимнин толорору бобор туһунан быһаарыы ылыннаҕына, Арассыыйа кыһыҥҥы Олимпийскай оонньуулартан аккаастаныан сөп диэбиттээх.
Госдума өссө биир дьокутаата, “Яблоко” баартыйа лидерэ Эмилия Слабунова МОК Арассыыйаны Олимпиадаттан туораппытыгар РФ бэрэсидьиэнин Владимир Путины буруйдаабыта, дойдубутун уонна спорстменнарбытын уган биэрдэ диэбитэ.
Роман Попов, “Саха сирэ” хаһыат, edersaas.ru