Олимпиадаҕа бэлэмнэнэр спортсменнар ааттара билиннэ

Ааптар: 
Бөлөххө киир:

2020 сыллааҕы Олимпийскай уонна Паралимпийскай, 2017 сыллааҕы Сурдлимпийскай оонньууларга бэлэмнэнэр спортсменнар испииһэктэрэ чуолкайданан, бүгүн Саха сирин Спорка министиэристибэтин кэллиэгийэтин сылы түмүктүүр мунньаҕар көрүллэн бигэргэтилиннэ.

Бу боппуруоска иһитиннэриини Үрдүкү спортивнай маастарыстыба оскуолатын дириэктэрэ Александр Игнатьев оҥордо. Ол быһыытынан, анал сыллаах олимпийскай бырагыраамаҕа: хайыһардьыт Никита Крюков, тустууктар Айаал Лазарев, Виктор Рассадин, Петр уонна Алексей Копыловтар, боксердар Василий Егоров, Айтал Дьяконов, чэпчэки атлет Сардаана Трофимова, паралимпиецтар Владимир Балынец, Степанида Артахинова, Алена Дмитриева, сурдлимпиецтар Сергей Николаев, Владимир Бородин, Валерий Чемпосов, Василий Стрекаловскай, Григорий Бысыкатов киирдилэр.

СӨ бырабыыталыстыбатын бэрэссэдээтэлин солбуйааччы Михаил Гуляев өссө бу испииһэккэ охчуттар Кристина, Розалина Тимофеевалары уонна хайыһардьыт Александр Клугены киллэрэргэ эттэ.

Оттон “Спорт Якутии” хаһыат редактора Александр Посельскай, испииһэккэ Виктор Лебедев, Егор Пономарев уонна Ньургун Скрябин тоҕо суохтарый диэн ыйытыытыгар, Үрдүкү спортивнай маастарыстыбатын дириэктэрэ – Пономаревтаах Скрябин ыйааһыннара олимпийскай бырагыраамаҕа суох, оттон Лебедев салгыы кыттарын дуу, кыттыбатын дуу быһаарына илик диэн хоруйдаата.

Маны тэҥэ кэллиэгийэ чилиэннэрэ Саха сирин тустууга хамаандаларын сүрүн тренердэрин бигэргэттэ. Ол курдук, көҥүл тустууга СӨ сүүмэрдэммит хамаандатын сүрүн тренеринэн – Владимир Кириллин, эдэрдэргэ сүүмэрдэммит хамаанданы – Станислав Захаров, уолаттарга сүүмэрдэммит хамаанданы – Прокопий Иванов, дьахталларга сүүмэрдэммит хамаанданы – Ким Колодезников, Сурдлимпийскай хамаанданы – Василий Стручков уонна гректии-римнии тустуу хамаандатын – Матвей Матвеев ананнылар. Кинилэри билиһиннэрэригэр уонна куоластааһыҥҥа туруорууга спорт миниистирэ Георгий Балакшин – үлэлэрин үчүгэйинэн сыаналаата, көрдөрүүлэр эриэ-дэхсилэрин санатта.

+1
0
+1
0
+1
0
+1
0
+1
0
+1
0
+1
0