Оскуола үөрэнээччилэрин Хотугулуу-Илиҥҥи олимпиадалара 2011 сылтан саҕалаан ыытыллар. ХИФУ үрдүк үөрэх иннинээҕи уонна профориентация факультета оскуолалары кытта ыкса ситимнээхтик үлэлиир. Инньэ гынан сылтан сыл кыттааччытын ахсаана элбээн, хаачыстыбата тупсан иһэр. Итиэннэ олимпиадаҕа миэстэлэспит оҕолор ХИФУ-ка үөрэххэ киирэллэригэр 10 баалга диэри эбии баал ааҕыллар. Бу туһунан ХИФУ пресс-сулууспата иһитиннэрэр.
“Тустаах олимпиадаҕа кыттар оҕолор уустук садаачаҕа суоту халыыпка киирбитинэн буолбакка, атыннык толкуйдаан таһаарар кыахтаахтар. Итинник эрэ устудьуоннар үөрэхтэригэр уонна олохторугар элбэҕи ситиһэллэр”, — диэн декан Светлана Федорова тоһоҕолоон этэр.
“Үрдүк үөрэххэ киирэр суол биир – олимпиада нөҥүө. Сайдыылаах, интэриэһиргиир оҕо аҥардас биир кэлим эксээмэҥҥэ бэлэмнэнэрэ тутах. Бүтүн Россиятааҕы уонна өрөспүүбүлүкэ иһигэр ыытыллар туох баар олимпиадаларга кыттара наада. Сыллата биһиги оҕолорбут оскуола үөрэнээччилэрин ортолоругар ыытыллар олимпиадаларга ситиһиилээхтик кытталлар. Онно төһө кыалларынан бэлэмнии, көҕүлүү сатыыбыт. Ол түмүгэр математика, физика олимпиадаларын кыайыылаахтара, үс иһигэр киирбит сорох оҕолорбут университекка ситиһиилээхтик үөрэнэ сылдьаллар”, — диэн Чурапчытааҕы гимназия дириэктэрин үөрэх чааһыгар солбуйааччы Любовь Прокопьева кэпсиир. Оскуола дириэктэрдэрэ, учууталлара олимпиада сүүмэрдиир түһүмэҕэ бэрт табыгастааҕын, босхотун, оҕолор үөрэхтэрин көтүппэккэ эрэ кыттар кыахтаахтарын бэлиэтииллэр.
Бу 6 сыл тухары олимпиадаҕа Россия 74 регионуттан уонна тас дойдулартан барыта 107698 үөрэнээччи кытынна. Санатан эттэххэ, олимпиада икки түһүмэҕинэн ыытыллар. Бастакы сүүмэрдиир түһүмэх интернет-тестирование быһыытынан алтынньыттан тохсунньуга диэри барар. Иккис түһүмэх олунньу-кулун тутар ыйдарга ыытыллар.
Манна даҕатан эттэххэ, олимпиадаҕа кыттар оҕо үөрэҕин таһынан эбии бэлэмнэнэр буолан, билиитэ дириҥиир, көрүүтэ кэҥиир. Итиэннэ саамай сүрүнэ толкуйдуу уонна ыараҥната үөрэнэр.
Людмила Попова.