Олимпиада кыайыылааҕа ХИФУ-га целевой миэстэ ылыаҕа

Ааптар: 
Бөлөххө киир:

Өрөспүүбүлүкэтээҕи орто оскуола 11 кылааһын үөрэнээччилэригэр анаан үс түһүмэҕинэн олунньу 20 – кулун тутар 24 күннэригэр экэниэмикэ, үп-харчы эйгэтигэр V телевизионнай олимпиада ыытыллан, бу күннэргэ түмүгэ тахсыаҕа.

edersaas.ru

Оҕолор билиилэрин тургутар, инники идэлэрин торумнуур тэрээһини СӨ Үбүн министиэристибэтэ, Үөрэх уонна наука министиэристибэтэ, М.К. Аммосов аатынан ХИФУ, «Саха» НКИК тэрийэн ыыталлар. Маны сэргэ, баан, үп-харчы эйгэтин үлэһиттэрэ үөрэнээччилэр социальнай-экономическай ыйытыктарга төһө быһаарсалларын, толкуйдуур, ырытар дьоҕурдарын сыаналыахтара.

Олимпиадаҕа БКЭ-ни туттарарга математиканы, нуучча, омук тылын, обществознаниены талбыт үөрэнээччилэр уонна Өрөспүүбүлүкэтээҕи предметнэй олимпиада түмүгүнэн дойду киин куораттарын үрдүкү үөрэх кыһатыгар киирэргэ туоһу сурук ылбатах оҕолор кытталлар.

Маҥнайгы түһүмэххэ Сахабыт сирин хас биирдии муниципальнай тэриллиитигэр улуустарга туһунан анал кистэлэҥ бэлиэлээх тестовай сорудахтар, садаачалар ыытыллыбыттара. Ону толорбут оҕолор иккис түһүмэххэ ааһан, онлайн үөрэх порталыгар киирэн, үп-харчы, экэниэмикэ эйгэтигэр айар үлэ суруйдулар. Салгыы бастыҥ үлэ ааптардара, 15 киһи бүтэһик тургутукка киирэн, телевидениеҕа «Саха» НКИК анал биэриитигэр кыттыахтара. Үс тыҥааһыннаах тургутан көрүү түмүгүнэн саамай үрдүкү баалы ылбыт үөрэнээччи олимпиада кыайыылааҕа буолан, ХИФУ Үп-харчы экэниэмикэ институтугар, экэниэмикэ бакалаврыгар «Үп-харчы уонна кирэдьиит» хайысханан целевой миэстэҕэ үөрэххэ киирэр кыахтаныаҕа. Өскөтүн математикаҕа, омук уонна нуучча тылыгар БКЭ-ни үөрэххэ киирэргэ ирдэнэр баалтан намыһаҕа суох туттардаҕына. Онтон олимпиада бүтэһик түһүмэҕэр тиийбиттэр өйдөбүнньүк бэлэхтэринэн наҕараадаланыахтара.

Биллэн турар, экэниэмикэ хайысхатынан үрдүк үөрэххэ киирэр урут да билигин да күөн күрэстэһиилээх, үөрэнээччиттэн уһулуччу чиҥ билиини, аналитическай сытыы өйү, инникини суоттаан, ыраҥалаан, түмүк оҥорор сатабылы эрэйэр. Билигин куонкуруска хапсыбатах оҕолор ыра санааларын ситиһэн, сөбүлүүр идэлэрин баһылыылларын туһугар төрөппүт ХИФУ-га 200-250 тыһ. солк. төлүөн наада. Бачча суумманы уйунар хамнастаах ыал аҕыйах буолуо, онон, маннык тэрээһиннэр, олимпиадалар айылҕаттан дьоҕурдаах оҕо талан ылбыт идэтин баһылыырыгар төһүү күүс, бигэ тирэхтээх далаһа буолаллар.

Марианна Тыртыкова, edersaas.ru

+1
0
+1
0
+1
0
+1
0
+1
0
+1
0
+1
0