Саханы аар саарга аатырдыбыт бөҕөстөрбүтүттэн биирдэстэрэ – көҥүл тустууга 1976 сыллааҕы Монреаллааҕы XXI Олимпийскай оонньуулар чөмпүйүөннэрэ, аан дойду, Европа чөмпүйүөнэ, ССРС спордун үтүөлээх маастара, Украинскай ССР үтүөлээх тириэньэрэ, Ил Түмэн дьокутаата Павел Пинигин бүгүн 65 сааһын бэлиэтиир.
Спорт суһумугар Павел Пинигин сулуһа 1976 сыллаахха чаҕылыйа тыкпыта. Ити сыл ССРС сүүмэрдэммит хамаандатын бөҕөһө Монреальга ыытыллыбыт сайыҥҥы XXI Олимпийскай оонньууларга 68 киилэҕэ диэри ыйааһыҥҥа кыайыылааҕы быһаарар түмүк хапсыһыыга АХШ бөҕөһүн Ллойд Кизеры 12:1 ахсаанынан хотон, олимпийскай чөмпүйүөн үрдүк аатын ылбыта.
Саха АССР физическай култууратын үтүөлээх үлэһитэ, ССРС спордун үтүөлээх маастара, Украинскай ССР үтүөлээх тириэньэрэ, экстра-кылаастаах аан дойдутааҕы категориялаах судьуйа, Саха Өрөспүүбүлүкэтин ХХ үйэҕэ спордун лауреата, Дьокуускай куорат уонна Чурапчы улууһун бочуоттаах гражданина, “Бочуот Знага”, “Хотугу Сулус” уордьаннар кавалердара Павел Пинигин аата астероидка уонна 63,37 караттаах алмааска иҥэриллибитэ.
Дьокуускай куоракка “Триумф” Спорт киинин киирэр ааныгар саха үс олимпиеһыгар – Роман Дмитриевкэ, Павел Пинигиҥҥэ, Александр Ивановка – пааматынньык туруоруллубута.
Олимпийскай чөмпүйүөн аатынан өрөспүүбүлүкэтээҕи, регионнааҕы таһымнаах күрэхтэһиилэр ыытыллаллар.
Павел Павлович «Олимпаҕа айан» (Дьокуускай, 1984), «Дело жизни моей – борьба» (Киев, 1990) кинигэлэр ааптардара.