close
Олоҥхоһут оҕолор
Култуура - Кыһа - Олох-дьаһах - Тыа сирэ

Олоҥхоһут оҕолор

Оскуола үөрэнээччилэрин күһүҥҥү сынньалаҥнарын туһалаахтык атааралларыгар анаан, Тааттаҕа, олоҥхоһут оҕолору дьарыктыыр, сайыннарар соруктаах лааҕыр тэриллибит. Бу туһунан  улуустааҕы олоҥхо ассоциациятыгар эрийэн Майя Егороваттан ыйыталастым.


Улуу убайбыт Былатыан Ойуунускай төрөөбүтэ 125 сылынан, Олоҥхо дэкээдэтин чэрчитинэн Ийэ олоҥхоһут Петр Решетников-Көһөҥө Бүөтүр дойдутугар, Чөркөөххө, орто оскуола баазатыгар «Көһөҥө көмүстэрэ»  диэн лааҕыр үлэлии турар. Лааҕыр үөрэх уонна култуура салаатын көмөтүнэн тэрилиннэ. Манна олоҥхону толорор уонна  толорорго холонор 12 оҕо сэттэ нэһилиэктэн кэлэн сылдьар. Кинилэр нэдиэлэ устатыгар олоҥхону толорууга дьарыктаналлар, улуу олоҥхоһуттар тустарынан билэллэр-көрөллөр, араас интэриэһинэй көрсүһүүлэргэ кытталлар, — диэн этэр.

«Көһөҥө көмүстэрин» иитиллээччилэрин Ийэ олоҥхоһут Петр Решетников стипендиата, «Удьурхай» этнобөлөх салайааччыта Раиса Маркова, Уус Тааттаттан ускуустуба оскуолатыгар оҕолору фольклорга уһуйааччы, эдэр олоҥхоһут Айта Васильева дьарыктыылларын, үөрэтэллэрин, оҕолор болҕомтолорун олус тардыбыттарын бэлиэтиир.

Лааҕырга интэриэһинэй, сэргэх буоллун диэн араас хабааннаах тэрээһиннэр, көрсүһүүлэр, маастар-кылаастар былааннаммытынан салҕана тураллара, улуус олохтоохторун, төрөппүттэри улаханнык сэргэхсиппит, үөрдүбүт. Холобур, оҕолор сарсыарда ойон тураат, олоҥхо хамсаныыларынан сэрээккэлииллэрин наһаа сөбүлээбиттэр, сонурҕаабыттар. Чөркөөх нэһилиэгиттэн «Далбар», «Утум», «Алаһа» түмсүүлэр лааҕыр оҕолоругар анаан кэлэн көрсөн, сэһэргэһэн, маастар-кылаас биэрэн үөрэтэн-такайан истиҥ-иһирэх, умнуллубат дьоро күннэри бэлэхтээбиттэр. Алаадьы киэһэтин, эмтээх үүнээйилэр тустарынан сэһэргэһиини, үрүҥ ас доруобуйаҕа туһатын, хайдах астанылларын  туһунан кэпсэтиилэри, билсиһиилэри улаханнык  астыммыттар.  Улуустааҕы ыччат отделын начаалынньыга, «Дьолуо» бөлөх чилиэнэ Иван Иванов оҕолору кытары көрсүбүт, олоҥхо дьоруойдарынан оруоллары үллэрэн дьарыктаабыт. Тыараһа орто оскуолатын учууталлара ахсаан, физика, айылҕа үөрэҕин уруоктарыгар олоҥхону туһаныы туһунан олус интэриэһинэйдик кэпсээн, быһааран болҕомтону улаханнык тардыбыттар.

Биһиги корр., «Саха сирэ» хаһыат, edersaas.ru 

#бүгүн: 1
2
0

Сайт матырыйаалларын ааптар көҥүлэ суох ылар бобуллар.

Мин санаам:

шестнадцать − 13 =