Аны сайын Нам улууһугар өрөспүүбүлүкэтээҕи XIII Олоҥхо ыһыаҕа буоларынан, ахсынньы 4-5 күннэригэр И.Е.Винокуров аатынан Намнааҕы педагогическай колледж баазатыгар «Олоҥхо ыһыаҕа: төрүт үгэстэри сөргүтүү, харыстааһын, тарҕатыы» диэн Х өрөспүүбүлүкэтээҕи научнай-практическай кэмпириэнсийэ саҕаланна.
edersaas.ru
Кэмпириэнсийэ кыттыылаахтара бүгүн иккис күнүн Олоҥхо ыһыаҕын бырагырааматын торумнууллар, саҥа суоллары тобулаллар. Манна араас лиэксийэлэр, сэминээрдэр, маастар-кылаастар буолуталыыллар, быыстапкалар туруоруллаллар. Тэрээһиҥҥэ учуонайдар, преподавателлэр сүбэ, күүс-көмө буолаллар.
Оттон саха үгэс буолбут таҥаһыгар, иискэ-ууска өрөспүүбүлүкэҕэ биллэр-көстөр дьон, норуот маастардара, экспердэр — саха норуодунай худуоһунньуга Анна Зверевэ, “кыбытыы тигиигэ” маастар Мария Сыромятникова, туос-сиэл оҥоһуктарга Татьяна Карамзина, Елизавета Олесова, о.д.а., олоҥхону толорооччу, “Ыччат олонхоһут” Өрөспүүбүлүкэтээҕи уопсастыбаннай түмсүү бэрэсидьиэнэ Юрий Борисов, Олоҥхо тыйаатырын артыыстара Александр Дьячковскай-Саарын оһуохайга, тойукка, Прокопий Сыроватскай кырыымпаҕа, Нам улууһуттан импровизатор-хомусчут Вера Гаврильева хомуска, уо.д.а. маастар-кылаас ыыталлар. Ем.Ярославскай аатынан Саха судаарыстыбаннай мусуойун фондатыттан экспонаттар көрдөрүүгэ туруоруллубуттар. Кэмпириэнсийэ сүрүн модератордара – СӨ Олоҥхо киинэ уонна Өрөспүүбүлүкэтээҕи “Олоҥхо ассоциацията” уопсастыбаннай тэрилтэ.
Оттон бүгүн, ахсынньы 5 күнүгэр, киэһэ 17 чаастан Олоҥхо тыйаатыра, “Эдэр ыччат, билигин олоҥхону истэр, ааҕар, көрөр кэм кэллэ!
Ситим быстыбат. Омуннаах олоҥхо оҕолоро билигин да баарбыт!”, — диэн, дьону-сэргэни Нам педагогическай колледжыгар «Ала Булкун» — улуу Чээбий олоҥхотунан бастакы көрдөөх испэктээкилигэр ыҥырда:
“Өскөтүн эн эдэр буоллаххына,
Өскөтүн өбүгэҥ өйүн-санаатын,
Сиэрин-туомун уһатар буоллаххына,
Биһигини кытары бииргэ буол!”
Татьяна Маркова, edersaas.ru