Олох саҥа таһымҥа тахсар: киин куоракка Новаторство сылын дьаһаллара былааннанар
Киин куоракка биллэриллибит Новаторство сылыгар анаммыт мунньаҕы Айсен Николаев быйылгы сыл сүрүн сыалынан дьон көҕүлээһинин, бастыҥ идиэйэлэрин, бизнес-бырайыактарын инники күөҥҥэ таһаарыы буолар диэн тылларынан саҕалаата.
Куорат баһылыгын бастакы солбуйааччы Дмитрий Садовников сыл чэрчитинэн үлэ сэттэ хайысханан ыытылларын иһитиннэрдэ. Ол курдук, «Дьокуускай кэскилэ» бырайыак оҕо технопаркаларын ситимин сайыннарыыга, онуоха 2018 сыл өрөспүүбүлүкэҕэ Дьарыктаах буолууну көҕүлүүр сылынан биллэриллибитинэн, оскуола үөрэнээччилэрин идэҕэ туһаайыы үлэтэ күүһүрүөҕэ. «Киин куорат доброволецтара» бырайыак социальнай хайысхалаах, гражданскай-патриотическай дьаһалларга ыччаты, волонтерскай хамсааһыны тардыаҕа. «Дьокуускайы тутабыт» бырайыак архитектура, тутуу эйгэтигэр технологиялары киллэриигэ, уулуссалары сырдатыыга, кыбартааллары тупсарыыга ананар. «Дьокуускай — кыаҕы туһаныы куората» бырайыак орто уонна дьоҕус урбааны оскуолаҕа оҕо аһылыгын тэрийии, саҥа үлэ миэстэлэрин таһаарыы, тыа хаһаайыстыбатыгар аныгы технологияны киллэрии о.д.а. курдук инновационнай бырайыактарга кытыннарыыга үлэлиэҕэ.
Ааспыт сылларга саҕаламмыт «Чэлгийэр Дьокуускай» бырайыак куораты көҕөрдүүгэ, тупсарыыга үлэтин ландшафтнай архитектордары уонна научнай холбоһуктары тардан, өссө кэҥэтиэҕэ. «Инженернэй быһаарыы» бырайыак ОДьКХ уонна энергетика эйгэтигэр, тутууга, тупсарыыга саҥа инженернэй технологиялары киллэриигэ туһаайыллыаҕа. Аныгы информационнай-коммуникационнай технологияларынан үлэ «Якутск цифровой» бырайыак чэрчитинэн салайыллыаҕа. Ити курдук, бырайыактар куорат олоҕун-дьаһаҕын бары эйгэтин тупсарыыга үлэлиэхтэрэ. Маны быһааран туран, бу бырайыактарынан ыытыллар дьаһаллар былааннарын Айсен Николаев тохсунньу 25 күнүгэр диэри оҥорорго сорудахтаата.
Раиса СИБИРЯКОВА, “Саха сирэ” хаһыат, edersaas.ru