Бу күннэргэ Саха сиригэр Франтишек Штефунка салайааччылаах Чехия бизнеһин сирэйдиир «Chovservis» уонна «Xenia Co.» хампаанньа салайааччылара кэлэн, олохтоох табаары оҥорон таһаарааччылар бородууксуйаларын кытта билсэн бардылар.
edersaas.ru
СӨ Инвестицияҕа агентствота ыалдьыттарга олохтоох оҥорон таһаарыыга олохтоохтук үлэлэһэр Инвестиция сайдыытын уонна предпринимательство, Тыа хаһаайыстыбатын министиэристибэлэрин, Атыы-эргиэн балаататын үлэлиир хайысхаларын билиһиннэрдэ.
Инвестордар оҥорон таһаарааччыларга сылдьан, кэскиллээх үлэ бырайыактарын көрдүлэр-иһиттилэр. Ол курдук, «Таастах» ТХПК, «Сахаконсервпродукт» уонна «Айгуль» хааччахтаммыт эппиэтинэстээх тэрилтэлэр бэйэлэрэ оҥорон таһаарар бородууксуйаларын билиһиннэрдилэр.
«Xenia Co.» консалтинговай хампаанньа салайааччыта тойон Ирковскай Европаҕа ыраас экологическай ас бородууксуйата олус сыаналанарын бэлиэтээн туран,”Саха сиригэр оҥоһулунна” уонна “Туундара күүһэ” диэн брендэлэри сайыннарыыга анаан сорунан үлэлэһиэх буолла. Тойон Штефунка «Chovservis» хампаанньа уонна Саха сирэ бииргэ үлэлээһин туһунан кэпсэтиини ыыппыттарынан сибээстээн, олохтоох бородууксуйаны Чехия Өрөспүүбүлүкэтигэр пропагандалыах буолла. Бу кэскиллээх үлэни олохтоохтук тэрийэр инниттэн, инвестор Саха сиригэр өссө да кэлэ сылдьыаҕын туһунан эттэ.
— Олохтоох бородууксуйа Европа дойдутугар экспорга таһаарылларынан сибээстээн, мантан инньэ Саха сирин уонна Чехия өрөспүүбүлүкэлэрин агропромышленнай хампаанньалара уопут атастаһыахтара. Онон өрөспүүбүлүкэҕэ оҥоһуллар ас-үөл бородууксуйата омук сиригэр тахсарыгар бастакы кэскиллээх олук ууруллунна, — диэн бэлиэтээтэ СӨ Инвестиция сайдыытын уонна предринимательство миниистирин бастакы солбуйааччы Алексей Загоренко.
Елена ПОТОЦКАЯ, «Саха сирэ» хаһыат, edersaas.ru