Билигин Хотугулуу Илиҥҥи федеральнай университекка Саха сирин оҕолоро эрэ буолбакка, оннооҕор тас дойду устудьуоннара сөбүлээн үөрэнэллэр. Бэл, Монголия, Кытай, Великобритания , Таджикистан, Корея, Франция эдэр дьоно бааллар. Бу күннэргэ омук уонна Саха сирин устудьуоннара Таатта улууһугар ыалдьыттаатылар.
Анивера Акимова, «Саха сирэ» хаһыат, https://edersaas.ru/
Улуус дьаһалтатын исписэлииһэ Анна Яковлева «Эдэр саас» сайтка иһитиннэрбитинэн, устудьуоннар Тааттаҕа сырыылара норуоттар икки ардыларынааҕы бырайыак чэрчитинэн ыытыллыбыт. Устудьуоннар Кыйы, Чөркөөх, Ытык Күөл оскуолаларыгар уонна мусуойдарыгар сылдьан, саха норуотун үгэстэрин, култууратын кытары билсибиттэр.
– Бөлөҕү Оксфордтааҕы университет дуоктара С.А. Мусалимас арыаллаан кэлбитэ. Кини Суорун Омоллоон айар үлэтин, олоҕун үөрэтэр эбит. Сүрдээҕин астынан, дуоһуйан барда. Элбэх саҥаны биллэ, көрдө – диэн Анна кэпсээтэ.
Инникитин Таатта улууһун дьаһалтата Чөркөөх уонна Хадаайы баазаларыгар аан дойдутааҕы таһымнаах оскуолалары тэрийэр соруктаахтарын кэпсээбиттэр. Онон норуоттар икки ардыларынааҕы сибээһи бөҕөргөтөр санаалаахтар.
Анивера Акимова, «Саха сирэ» хаһыат, https://edersaas.ru/