close
Оперативниктар былырыыҥҥы өлөрүүнү арыйдылар
Бэрээдэк - Олох-дьаһах

Оперативниктар былырыыҥҥы өлөрүүнү арыйдылар

Былырыын сэтинньигэ, суол-иис сабыллыбыт кэмигэр, Өлүөхүмэ улууһун киһи дэбигис тиийбэт биир сэлиэнньэтин дьаһалтатыгар 39 саастаах киһи аймахтара көрдөһүүлээх тиийбиттэр.  

edersaas.ru

Бу дьон улуус киинигэр олороллор эбит, ол иһин ити сэлиэнньэҕэ олорор аймахтара киһи кинилэргэ сибээскэ тахсыбатаҕа ырааппытын дьаарханан кэпсээбиттэр, олорор сирин баран бэрэбиэркэлээҥ диэн көрдөспүттэр. Сүтэрбит киһилэрэ сэлиэнньэ уһугар бэйэтэ бэйэтигэр бүөмчү олорбут эбит.

Сол күн дьаһалта үлэһиттэрэ бу киһи өлүгүн дьиэтиттэн булан, тута полицияҕа тыллаабыттар уонна аймахтарыгар эппиттэр.

Өлүк көстүбүт сиригэр суһал-силиэстийэлиир бөлөх тиийбит. Бу эрэйдээҕи саанан ытан өлөрбүттэр эбит.

Ити чахчынан «Киһини соруйан өлөрүү» ыстатыйанан холуобунай дьыала тэриллибит эрээри, ол кэмҥэ бу ыар буруйу арыйыы кыаллыбатах. Бэйэтэ дьонтон тэйиччи олорор буолан, ким да тугу да билбэтэх-көрбөтөх буолан тахсыбыт.

Инньэ гынан, Өлүөхүмэ полицейскайдарыгар Ис дьыала министиэристибэтин холуобунай ирдэбилгэ управлениетын оперативниктара көмөҕө тиийбиттэр. Ол түмүгэр, өлүөхсүт тиһэх күнэ хайдах ааспыта уонна уорбаланааччы кимэ биллибит.

Барыллаан быһаарыынан, урут сууттана сылдьыбыт 29 саастаах уорбаланааччы өлүк көстүөр хас да нэдиэлэ иннинэ бу киһиэхэ ыалдьыттыы кэлбит эбит. Иккиэн урут хаайыыга олоро сылдьыбыт дьон арыгылыы олорон кыыһырсыбыттар. Онуоха ыалдьыт ити иннинэ аймаҕыттан уларсыбыт саатынан дьиэлээх хаһаайыны ытан, миэстэтигэр өлөрбүт.

Уонна тугу оҥорбутун дьэ долоҕойугар тиэрдэн, ааны хатаан баран, атахха биллэрбит. Ол кэнниттэн саатын кистээбит.

Оперативниктар сааны булан былдьаатылар. Уорбаланааччыны силиэстийэлиир изоляторга хаайар туһунан боппуруос көрүллэр. Силиэстийэ салҕанан барар.

Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

4 × 1 =